سیاست

فوزیه کوفي: افغانان دې د افغانستان د ستونزو د حل لپاره پر خپل ځواک تکیه وکړي

اشتراک گذاری:

بریانیوز چهارشنبه ( ۴/ سنبله /۱۴۰۵هـ.ش)

د پخوانۍ ولسي جرګې غړې فوزیه کوفي د امریکا کانګرېس ته د افغان‌الاصلې امریکايۍ عایشه وهاب د وروستیو څرګندونو په غبرګون کې ویلي، افغانان باید د خپل هېواد د ستونزو د هواري لپاره له نړیوالې ټولنې څخه د مرستې او حللارې تمه ونه لري

کوفې ویلي، د عایشه وهاب د کار موده لا یوازې شاوخوا درې میاشتې شوې او په باور یې د افغانستان د اوسني وضعیت مسوولیت باید خپله افغانان، په ځانګړي ډول غیرطالب افغانان، پر غاړه واخلي

هغې ټینګار کړی چې د افغانستان د سیاسي او ټولنیزو ستونزو د حل لپاره باید افغانان خپل دریځونه پیاوړي او د هېواد د راتلونکي په اړه د پرېکړو مسوولیت خپله واخلي

د عایشه وهاب وروستۍ څرګندونې وروسته له هغې مطرح شوې چې نوموړې ویلي وو، واشنګټن باید له کابل سره د دیپلوماتیک تعامل لاره پرانیزي. د هغې دې غوښتنې د افغانانو ترمنځ بېلابېل غبرګونونه راپارولي دي

د وهاب پلویان باور لري چې له کابل سره دیپلوماتیک تعامل کولی شي د افغانستان د ستونزو د مطرح کولو او د افغانانو د اړتیاوو د رسولو لپاره د خبرو زمینه برابره کړي

خو منتقدین بیا وايي، له طالبانو سره هر ډول رسمي تعامل باید د مشروعیت، بشري حقونو او سیاسي مشارکت په څېر موضوعاتو له روښانه ضمانتونو سره تړلی وي. دوی ټینګار کوي چې د اوسني حکومت له رسمي مشروعیت پرته باید له هغه سره د پراخو سیاسي اړیکو په اړه احتیاط وشي

د افغانستان د راتلونکي په اړه د افغان سیاستوالو ترمنځ دا اختلافات په داسې حال کې دوام لري چې د طالبانو حکومت هڅه کوي له یو شمېر هېوادونو سره خپلې سیاسي او اقتصادي اړیکې پراخې کړي، خو د نړیوالې ټولنې ډېری هېوادونه لا هم د رسمي پېژندنې په اړه محتاط دریځ لري

فوزیه کوفي وايي، د افغانستان د راتلونکي برخلیک باید تر ډېره د افغانانو په لاس کې وي او د هېواد د ستونزو د حل لپاره باید د بهرنیو هېوادونو پر پرېکړو تکیه ونه شي