تعلیم

مطالعه : سنګاپور د مطالعې د دود د پیاوړتیا لپاره خلکو ته انعام ورکوي

اشتراک گذاری:

بریانیوزپنجشنبه (۲۶/ سنبله /۱۴۰۵هـ.ش)

سنګاپور — سنګاپور د خلکو ترمنځ د مطالعې د عادت د پیاوړتیا لپاره یو پنځه کلن ملي پروګرام پیل کړی چې له مخې یې ګډونوال هڅول کېږي هره ورځ لږ تر لږه ۱۵ دقیقې مطالعه وکړي

د دې پروګرام له لارې ګډونوال کولای شي خپله ورځنۍ مطالعه ثبت کړي او د دوامدارې مطالعې په بدل کې مجازي سکې ترلاسه کړي. د پروګرام له مخې، د لږ تر لږه ۱۵ دقیقو مطالعې هره ورځنۍ ناسته ۲۰ مجازي سکې ورکوي

د ۱۰۰۰ مجازي سکرو ارزښت یو سنګاپوري ډالر ټاکل شوی دی. ګډونوال په ورځ کې یوازې د یوې مطالعې ناستې د ثبتولو اجازه لري، نو د ۱۰۰۰ سکو ترلاسه کولو لپاره ۵۰ ورځې د ۱۵ دقیقو مطالعې ثبتول اړین دي

دغه نوښت د خلکو د مطالعې د دوامدار عادت د رامنځته کولو ترڅنګ د چټکو او لنډو برېښنايي مطالبو پر ځای د کتابونو او ژورې مطالعې پر لور د خلکو د پام اړولو په موخه پیل شوی دی

د سنګاپور د ملي کتابتون د معلوماتو له مخې، د دې پروګرام موخه دا ده چې مطالعه د خلکو په ورځني ژوند کې په یوه دوامدار عادت بدله شي او د تمرکز، ژور فکر او د معلوماتو د درک وړتیا پیاوړې کړي

د سنګاپور د ۲۰۲۴ کال د مطالعې د عادتونو یوې څېړنې ښودلې چې ۸۹ سلنه لویان په اونۍ کې له یو ځل زیات څه لولي، خو یوازې ۲۸ سلنه یې کتابونه لولي؛ په دې توګه د نوي پروګرام تمرکز د کتاب لوستلو او ژورې مطالعې پر زیاتولو دی