مقاله

افغانستان: د مکې پر لور هر ډول ګواښ نه‌بښل کېدونکی جرم دی

اشتراک گذاری:

بریانیوز جمعه (۲۷/ سنبله /۱۴۰۵هـ.ش)

د افغانستان د بهرنیو چارو وزارت مکې مکرمې ته نږدې د بې‌پیلوټه الوتکې د برید د ادعا شوې هڅې په اړه ژوره اندېښنه څرګنده کړې او هر هغه اقدام یې په کلکه غندلی چې د دوو سپېڅلو جوماتونو امنیت او حرمت له ګواښ سره مخ کوي

د دغه وزارت ویاند عبدالقهار بلخي ویلي، د مکې مکرمې او مدینې منورې پر سپېڅلو ځایونو هر ډول ګواښ «نه‌بښل کېدونکی جرم» دی او باید په کلکه وغندل شي

نوموړي ویلي، دوه سپېڅلي جوماتونه د ټولې اسلامي نړۍ ګډ مقدسات دي او امنیت، حرمت او تقدس یې باید د هر ډول جګړې، تاوتریخوالي او پوځي اقداماتو له اغېزو خوندي وساتل شي

د بهرنیو چارو وزارت خبرداری ورکړی چې د دغو سپېڅلو ځایونو پر وړاندې هر ډول ګواښ د مسلمانانو احساسات ژور زیانمنوي او په سیمه کې د لا زیاتې بې‌ثباتۍ لامل کېدای شي

دا څرګندونې وروسته له هغې کېږي چې سعودي چارواکو وویل، د مکې مکرمې په جنوب کې یې یوه بې‌پیلوټه الوتکه له دې مخکې شنډه کړې چې د ښار ممنوعه هوايي حریم ته ننوځي. حوثیانو بیا د مکې یا نورو اسلامي سپېڅلو ځایونو د هدف ګرځولو ادعا رد کړې ده