پاکستان د افغانستان ۶۵ سلنه بازار له لاسه ورکړ

د پاکستان رسنیو راپور ورکړی چې د تورخم د بندر د یوې میاشتې تړل کېدو له امله، د دواړو هېوادونو ترمنځ سوداګري له درنو مالي زیانونو سره مخ شوې ده. د اټکل له مخې، یوازې په دې موده کې پاکستان نږدې ۴.۵ میلیارده ډالر او ۱۶.۵ میلیارده پاکستانۍ روپۍ زیان لیدلی دی

د راپورونو له مخې، له هغه وخت راهیسې چې امارت اسلامي په افغانستان کې واک ته رسېدلی، پاکستان د افغانستان شاوخوا ۶۵ سلنه سوداګریز بازار له لاسه ورکړی دی. دغه بازار اوس د سیمې نورو هېوادونو لکه ایران، د منځنۍ آسیا هېوادونو، ترکیې او هند ته اړول شوی دی

د سوداګرۍ شنونکي وایي، د تورخم د بندر پرله‌پسې تړل کېدل، د سوداګرۍ ناسم فضا، او د دواړو هېوادونو ترمنځ د بې‌باورۍ زیاتوالی، د دې لامل شوی چې ډېری پانګه‌وال خپلې پانګې وباسي او د نوو بازارونو لور ته مخه کړي

د کوچنیو سوداګرو په وینا، د بندر اوږدمهاله تړل کېدل نه یوازې د هغوی عواید کم کړي، بلکې د سوداګرۍ پر اعتماد یې هم ژوره اغېزه کړې ده. د ډېرو کسانو لپاره، د تورخم مسیر اوس یو نامطمئنه لاره ګرځېدلې ده

کارپوهان خبرداری ورکوي، که پاکستان د افغانستان سره خپل سوداګریزې اړیکې بېرته نه پیاوړې کوي، نو دا به د هغه هېواد د صادراتو لپاره یو ستر او اوږدمهاله زیان وي. په مقابل کې، افغانستان هڅه کوي چې خپلې سوداګریزې اړیکې له سیمې نورو هېوادونو سره پراخې کړي او د یو‌ اړخیز اقتصاد پر ځای، یو متوازن او متنوع بازار رامنځته کړي

 دا تحول د سیمې د اقتصادي اړیکو په نقشه کې یو مهم بدلون ګڼل کېږي، چې ښيي افغانستان ورځ تر بلې د خپل اقتصاد د خپلواکۍ او د بدیلو سوداګریزو لارو په لټه کې دی