د خلیج په سیمه کې کړکېچ زیاتېږي؛ سعودي ایران ته سخت خبرداری ورکړ

د خلیج په سیمه کې کړکېچ زیاتېږي؛ سعودي ایران ته سخت خبرداری ورکړ

بریانیوز:(پنجشنبه، ۲۸ حوت۱۴۰۴)

د سعودي عربستان د بهرنیو چارو وزیر په تازه څرګندونو کې ایران ته خبرداری ورکړی چې د خلیج د هېوادونو د صبر کاسه نږدې ده چې ډکه شي، او که د تهران له لوري تېري دوام ومومي، نو دغه هېوادونه د قوي او پرېکنده ځواب ورکولو بشپړه وړتیا لري

دغه څرګندونې وروسته له هغې کېږي چې ایران د قطر د “راس لافان” او د متحده عربي امارات د “حبشان” د ګازو پر مهمو تاسیساتو توغندیز بریدونه ترسره کړل. دا تاسیسات د سیمې لپاره حیاتي اقتصادي ارزښت لري او هر ډول برید پرې د نړیوالو انرژۍ بازارونو پر ثبات مستقیم اغېز لرلی شي

د سعودي چارواکو ویلي چې دا ډول بریدونه نه یوازې د نړیوالو قوانینو ښکاره سرغړونه ده، بلکې د سیمې امنیت او ثبات ته جدي ګواښ هم ګڼل کېږي. د بهرنیو چارو وزیر ټینګار کړی چې خلیجي هېوادونه به د خپلو ملي ګټو، اقتصادي شریانونو او سیمه‌ییز امنیت د خوندي کولو لپاره هر ډول اړین ګامونه واخلي

بل خوا، قطر د دې بریدونو په غبرګون کې سخت دیپلوماتیک اقدام کړی او د ایران یو شمېر ډیپلوماټان یې له خپل هېواده ایستلي دي. د قطر حکومت ویلي چې د خپل حاکمیت او ملي امنیت د ساتنې لپاره به له هېڅ ډول اقدام څخه ډډه ونه کړي

سیاسي شنونکي باور لري چې دغه وروستۍ پېښې د خلیج په سیمه کې د تاوتریخوالي د نوې څپې پیل کېدای شي، چې ښايي پراخې سیمه‌ییزې او نړیوالې پایلې ولري. دوی ټینګار کوي چې که ژر تر ژره د ډیپلوماسۍ له لارې د وضعیت د کنټرول هڅې ونه شي، نو دا کړکېچ ښايي له کنټروله ووځي

په همدې حال کې نړیواله ټولنه له ټولو ښکېلو اړخونو غواړي چې له زغم څخه کار واخلي او د خبرو اترو له لارې د شخړې د حل لاره غوره کړي، څو سیمه له یوې لویې ناورین څخه وژغورل شي