سیاست

بریتانیا: د افغانستان په اړه د تاوتریخوالي زیاتوالی د اندېښنې وړ دی

اشتراک گذاری:

بریانیوز:(پنجشنبه، ۲۸ حوت۱۴۰۴)

د بریتانیا د افغانستان لپاره ځانګړي استازي ریچارډ لنډسي د کابل او د هېواد په نورو سیمو کې د پاکستان وروستي هوايي بریدونه په کلکه غندلي او هغه یې د جدي اندېښنې وړ بللي دي

لنډسي په خپلو څرګندونو کې ټینګار کړی چې د پوځي اقدامونو دوام کولای شي د سیمې امنیتي وضعیت نور هم خراب کړي او د ملکي وګړو ژوند له جدي خطر سره مخ کړي. هغه له ټولو ښکېلو اړخونو غوښتي چې د جګړې پر ځای د ډیپلوماسۍ او خبرو اترو لاره خپله کړي

د بریتانیا استازي ویلي چې د کړکېچونو حل یوازې د متقابل درناوي، باور جوړونې او دوامدارو مذاکراتو له لارې ممکن دی. هغه زیاته کړې چې روان تاوتریخوالی نه یوازې د افغانستان دننه وضعیت اغېزمنوي، بلکې د ګاونډیو هېوادونو پر امنیت هم مستقیم اغېز لري

سیاسي شنونکي باور لري چې د نړیوالو لوریو له خوا دا ډول څرګندونې ښيي چې نړیواله ټولنه د افغانستان د امنیتي وضعیت له خرابېدو ژوره اندېښنه لري او هڅه کوي چې د شخړو د پراخېدو مخه ونیسي

په پای کې، نوموړي یو ځل بیا ټینګار کړی چې د سولې او ثبات لپاره یوازینۍ اغېزمنه لاره خبرې اترې دي، او له دواړو خواوو یې غوښتي چې د تاوتریخوالي د کمولو لپاره عملي ګامونه پورته کړي