یوناما: د معلوماتي ټکنالوژۍ په برخه کې د نجونو زده کړه د افغانستان د راتلونکي لپاره حیاتي اړتیا ده

اشتراک گذاری:

بریانیوز:(جـمـعـه،۴/ثور/۱۴۰۵هـــ .ش)

د ملګرو ملتونو د مرستندویه پلاوي دفتر په افغانستان (یوناما) له خوا د معلوماتي ټکنالوژۍ په برخه کې د نجونو د نړیوالې ورځې په مناسبت په خپره شوې اعلامیه کې ویل شوي، چې زده کړه د یو باثباته راتلونکي، دوامدار کارموندنې او نوښت لپاره بنسټیز ارزښت لري

یوناما په خپلې اعلامیه کې د افغانستان د نجونو پر وړاندې د تعلیمي محدودیتونو په اړه ژوره اندېښنه څرګنده کړې او ټینګار یې کړی چې له تېرو څه باندې څلورو نیمو کلونو راهیسې، د افغان نجونو یو بشپړ نسل لا هم له زده کړو بې‌برخې پاتې دی. دغه بنسټ دا وضعیت د هېواد د پرمختګ پر وړاندې یو جدي خنډ بللی او ویلي یې دي چې د ټولنې نیمایي برخه له زده کړو محرومول د ملي ودې او سوکالۍ لپاره ناوړه پایلې لري

په اعلامیه کې راغلي، چې د نجونو زده کړه نه یوازې د هغوی فردي حق دی، بلکې د ټولنې د پیاوړتیا، اقتصادي پرمختګ او ټولنیز عدالت لپاره هم حیاتي ارزښت لري. یوناما زیاته کړې چې د معلوماتي ټکنالوژۍ په عصر کې د نجونو ګډون کولی شي افغانستان د نوښت، پرمختګ او نړیوالو سیالیو په ډګر کې پیاوړی کړي

یاد بنسټ د افغانستان له سرپرست حکومت څخه غوښتنه کړې، چې د نجونو پر زده کړو لګول شوي محدودیتونه ژر تر ژره لرې کړي او ټولو نجونو ته د زده کړې برابر فرصتونه برابر کړي، څو هېواد وکولای شي یو روښانه او باثباته راتلونکی تضمین کړي

کارپوهان هم په دې باور دي چې که د نجونو پر وړاندې تعلیمي دروازې پرانیستل شي، نو دا به د افغانستان په ټولنیز، اقتصادي او علمي ډګرونو کې د پام وړ بدلونونه راولي او هېواد به د پرمختګ پر لور چټک ګامونه واخلي