طالبان له خپلو جنګیالیو پرته نور ټول ملت د عفوې محتاج او منندوی ګڼي

اشتراک گذاری:

د طالبانو مشر مولوي هبت الله اخوندزاده ویلي چې د پخواني حکومت له کارکوونکو او مخالفانو سره یې د اعلان شوې عمومي عفوې له مخې حساب نه دی کړی او نه به یې وکړي.

بریانیوز - پنجشنبه، ١٤ جوزا ١٤٠٥

د طالبانو مشر مولوي هبت الله اخوندزاده د شمال لویدیځ او شمال ختیځ زون د نهو ولایتونو له والیانو، د علماوو شوراګانو له رییسانو او د استیناف محکمو له چارواکو سره په کندهار کې د لیدنې پر مهال ویلي، هغه عمومي بښنه چې د خپلو مخالفانو لپاره یې اعلان کړې وه، لا هم پر خپل ځای ده او دوی له پخوانیو مخالفانو سره حساب نه کوي.

هبت الله اخوندزاده ویلي، دغه بښنه یې د دې لپاره اعلان کړې وه چې د غچ اخیستنې مخه ونیول شي او په افغانستان کې سوله او ثبات ټینګ شي. نوموړي زیاته کړې چې د پخواني حکومت ډېری منسوبینو وسلې پر ځمکه کېښودې او د همدې بښنې له مخې ورسره حساب نه دی شوی او نه به هم وشي.

هغه خپلو والیانو او چارواکو ته سپارښتنه کړې چې د عفوې، زغم او د بدیو د له منځه وړلو پیغام خلکو ته ورسوي او خلک وهڅوي چې یو له بل سره بښنه او نرم چلند وکړي.

د طالبانو مشر همداراز ټینګار کړی چې د شریعت او امربالمعروف او نهی عن المنکر احکام باید په بشپړه توګه عملي شي او د دوی چارواکي باید لومړی د ده فرمانونه پر ځانونو تطبیق کړي او بیا یې خلکو ته ورسوي.

سره له دې چې طالبان د عمومي بښنې خبره کوي، خو په وروستیو کلونو کې د پخواني حکومت د امنیتي ځواکونو د نیولو، شکنجې، زنداني کولو او حتی په زندانونو کې د ځینو د مړینې راپورونه هم خپاره شوي دي. سربېره پر دې، لا هم د هېواد په بېلابېلو سیمو کې مرموزې وژنې رامنځته کېږي چې عاملین یې په ډاګه نه دي او د ډېرو پېښو په اړه روښانه او قانع کوونکي معلومات نه دي وړاندې شوي.

یو شمېر منتقدین په دې باور دي چې د طالبانو چلند داسې انګېرنه رامنځته کړې چې ګواکې د دوی د جنګیالیو پرته د ټولنې ډېری نور قشرونه د شک او تور تر سیوري لاندې ګڼل کېږي او له خلکو تمه کېږي چې د طالبانو له اعلان شوې عفوې څخه منندوی واوسي. خو د دې تر څنګ، ګڼ افغانان لا هم د خپلو مدني، سیاسي او ټولنیزو حقونو د محدودیتونو په اړه اندېښنې څرګندوي.

د طالبانو ارګ په خپره کړې اعلامیه کې ویلي چې د علماوو شوراګانو غړو په دې ناسته کې له مولوي هبت الله اخوندزاده سره خپل بیعت هم نوی کړی دی.