مقاله

روسیې سنټ پیټرزبورګ ته نږدې ۲۵ بې‌پیلوټه الوتکې نسکورې کړې

اشتراک گذاری:

بریانیوز- شنبه، ١٦ جوزا ١٤٠٥

د روسیې سیمه‌ ییزو چارواکو ویلي چې د دغه هېواد هوايي دفاعي ځواکونو د سنټ پیټرزبورګ ښار په شاوخوا سیمو کې ۲۵ بې‌ پیلوټه الوتکې شنډې او نسکورې کړې دي

د راپورونو له مخې، دا پېښه په داسې وخت کې رامنځته شوې چې روسیه په سنټ پیټرزبورګ کې د خپل مهم نړیوال اقتصادي فورم کوربه‌توب کوي او د نړۍ له بېلابېلو هېوادونو څخه سیاسي او اقتصادي استازي په کې ګډون لري

چارواکو تر اوسه د برید د احتمالي زیانونو، هدفونو او یا هم د ډرونونو د دقیقې سرچینې په اړه بشپړ معلومات نه دي خپاره کړي، خو ویلي یې دي چې امنیتي او دفاعي ځواکونه په بشپړ چمتووالي کې دي

که څه هم د دې پېښې مسئولیت کومې ډلې یا هېواد نه دی منلی، خو د روسیې او اوکراین د جګړې له پیل راهیسې د روسیې پر بېلابېلو سیمو د ورته بې‌ پیلوټه الوتکو د بریدونو پړه اکثره وخت پر اوکراین اچول شوې ده

شنونکي باور لري چې د سنټ پیټرزبورګ په څېر ستر اقتصادي او سیاسي مرکز ته نږدې د دغسې پېښو رامنځته کېدل د روسیې لپاره امنیتي اندېښنې زیاتوي، په ځانګړي ډول هغه مهال چې نړیوالې غونډې او مهم اقتصادي فورمونه پکې روان وي

دا پېښه په داسې وخت کې شوې چې د روسیې او اوکراین جګړه لا هم دوام لري او دواړه لوري د پوځي او امنیتي فشارونو د زیاتولو هڅه کوي