مریم امرخیل: د برلین افغان سفارت د پښتو عریضې له منلو ډډه کړې

اشتراک گذاری:

بریانیوز- دوشنبه ۱ سرطان ١٤٠٥

لیکواله او ژورنالېسته مریم امرخیل، چې د «کېږدۍ ګرځنده ښوونځیو» د مسؤلې په توګه هم پېژندل کېږي، په خپله فېسبوک پاڼه کې ادعا کړې چې د جرمني په برلین کې د افغانستان سفارت د هغې هغه عریضه نه ده منلې چې په پښتو ژبه لیکل شوې وه

د هغې په وینا، د سفارت کارکوونکو له هغې غوښتنه کړې چې یاد غوښتنلیک دې په دري ژبه ولیکي، ځکه چې په پښتو لیکل شوی متن د اداري بهیر لپاره د منلو وړ نه ګڼل کېده

امرخیل دغه چلند د پښتو ژبې پر وړاندې بې‌عدالتي او سپکاوی بللی او ویلي یې دي چې د افغانستان رسمي استازولۍ باید د هېواد د ټولو رسمي ژبو درناوی وکړي او د ژبني تبعیض مخه ونیسي

هغې ټینګار کړی چې د افغانستان د بهرنیو استازولیو اداري کړنې باید د ملي ژبو د برابري پر اصل ولاړې وي، څو هېڅ ژبه له بلې څخه کمه یا نادیده ونه ګڼل شي

تر اوسه د برلین د افغانستان سفارت له خوا د دې ادعا په اړه کوم رسمي غبرګون نه دی ورکړل شوی