ملګري ملتونه: افغانستان له ثبات سره سره له بشري، اقتصادي او امنیتي ننګونو سره مخ دی

اشتراک گذاری:

بریانیوزپنجشنبه (۲۶/ سنبله /۱۴۰۵هـ.ش)

ملګرو ملتونو خبرداری ورکړی چې که څه هم افغانستان د اسلامي امارت تر بشپړ واک لاندې له نسبي ثبات څخه برخمن دی، خو دغه هېواد لا هم له جدي بشري، اقتصادي او امنیتي ننګونو سره مخ دی

د ملګرو ملتونو په وینا، په افغانستان کې د امنیتي وضعیت له ښه کېدو سره سره د بشري حقونو په برخه کې فشارونه او محدودیتونه لا هم دوام لري او د خلکو پر ورځني ژوند اغېز کوي.

دغه سازمان ویلي، اقتصادي ستونزې، بې‌وزلي او د خلکو د لومړنیو اړتیاوو د پوره کولو محدود امکانات هغه مهمې ننګونې دي چې میلیونونه افغانان ورسره مخ دي

ملګرو ملتونو همداراز د بشري حقونو وضعیت ته اندېښنه ښودلې او ټینګار یې کړی چې د ښځو او نجونو پر زده‌کړو، کار او ټولنیز ګډون محدودیتونه لا هم د نړیوالې ټولنې له مهمو اندېښنو څخه دي

د ملګرو ملتونو په وینا، د افغانستان د اوږدمهاله ثبات لپاره یوازې امنیت بسنه نه کوي، بلکې اقتصادي پراختیا، د خلکو د حقونو درناوی، ټولنیز مشارکت او د بشري اړتیاوو پوره کول هم اړین دي