سیاست

ولسمشر ډونالډ ټرمپ: د ډیموکراتانو د بیا واک ته رسېدو په صورت کې به امریکا له سخت اقتصادي رکود سره مخ شي

اشتراک گذاری:

بریانیوزپنجشنبه (۲۶/ سنبله /۱۴۰۵هـ.ش)

د امریکا ولسمشر ډونالډ ټرمپ د شمالي کارولینا ایالت په ګاستونیا ښار کې د خپلو پلویانو یوې غونډې ته د وینا پر مهال خبرداری ورکړی چې که ډیموکراتان بېرته واک ته ورسېږي، امریکا به له پراخ اقتصادي رکود سره مخ شي

ټرمپ د خپلې وینا پر مهال د خپلې اقتصادي تګلارې دفاع کړې او ویلي یې دي چې د هغه د حکومت له لوري پر وارداتي توکو لګېدلي تعرفې د امریکا لپاره د پام وړ عواید رامنځته کوي

هغه د ډیموکراتانو اقتصادي تګلارې هم له خپلې تګلارې سره پرتله کړې او ادعا یې وکړه چې د هغوی د بیا واکمنېدو په صورت کې به د امریکا اقتصادي وضعیت له جدي ستونزو سره مخ شي

ټرمپ په داسې مهال دا څرګندونې کوي چې د نومبر د منځمهاله ټاکنو لپاره د امریکا سیاسي کمپاینونه روان دي او اقتصادي وضعیت، د توکو بیې او د خلکو د ژوند لګښتونه د بحث له مهمو موضوعاتو څخه دي

د هغه د حکومت د تعرفو تګلارې په اړه د اقتصادپوهانو او سوداګریزو برخو له لوري بېلابېل نظرونه مطرح شوي؛ ځینې یې د کورني تولید د ملاتړ وسیله بولي، خو مخالف نظرونه وايي چې تعرفې کولی شي د وارداتي توکو بیې لوړې کړي