اخبار جهان

کابل : د ترکیې د استخباراتو مشر له کابل وروسته کندهار ته سفر وکړ

اشتراک گذاری:

بریانیوزپنجشنبه (۲۶/ سنبله /۱۴۰۵هـ.ش)

د ترکیې د ملي استخباراتو مشر ابراهیم کالین افغانستان ته د خپل سفر پر مهال کابل او کندهار ته تللی او له یو شمېر لوړپوړو افغان چارواکو سره یې پر امنیتي او استخباراتي همکاریو خبرې کړې دي

کالین په کابل کې د استخباراتو عمومي ریاست له مشر عبدالحق وثیق سره لیدلي دي. نوموړي همداراز د اقتصادي چارو له مرستیال ملا عبدالغني برادر، د دفاع له وزیر مولوي محمد یعقوب مجاهد او د کورنیو چارو له وزیر سراج‌الدین حقاني سره کتلي دي

په دغو لیدنو کې د افغانستان او ترکیې ترمنځ د امنیتي او استخباراتي همکاریو د لا پراختیا لپاره د ممکنه ګامونو په اړه خبرې شوې او د دواړو هېوادونو پر اړیکو هم بحث شوی دی

د لیدنو پر مهال د سیمې او نړۍ وروستي بدلونونه، په ځانګړي ډول د امریکا، اسرائیلو او ایران ترمنځ روانه جګړه، هم د بحث له مهمو موضوعاتو څخه وه

دواړو لورو د ترهګرۍ پر وړاندې د مبارزې، د انسانانو د قاچاق د مخنیوي او د نشه‌یي توکو د سوداګرۍ پر وړاندې د ګډو هڅو په اړه هم خبرې کړې دي

کالین د کابل تر لیدنو وروسته کندهار ته هم سفر کړی، خو د هغه د کندهار د سفر د پروګرام او هلته د ترسره شویو احتمالي لیدنو په اړه نور جزیات نه دي خپاره شوي