د زده کړو پر لومړیتوب د حکمتیار ټینګار؛

د زده کړو پر لومړیتوب د حکمتیار ټینګار؛

«تعلیم ته بې‌پامي د هېواد له راتلونکې سره دښمني ده»

بریانیوز:(یکشنبه،۱۷ حوت۱۴۰۴) حبیب‌الرحمن حکمتیار، افغان سیاسي څېره، په خپل رسمي پاڼه ایکس کې د پیغامونو په خپرولو سره په افغانستان کې د زده کړو او معاصرو علومو د پراختیا پر اهمیت ټینګار کړی او ویلي یې دي چې تعلیم او تربیې ته لومړیتوب ورکول کولی شي د هېواد لپاره روښانه راتلونکی رامنځته کړي.

حکمتیار د شنبې په ورځ، د حوت په ۱۶مه چې د مارچ له ۷مې سره برابره ده، په یوه پیغام کې لیکلي چې پرته له دې چې ځانونه وغولوو باید ومنو چې «تعلیم او پوهې ته لومړیتوب ورکول د هېواد د ښه راتلونکي یوازینۍ لاره ده» او هر څوک چې دې موضوع ته ارزښت نه ورکوي، په حقیقت کې د ملي ګټو پر وړاندې دریږي. د هغه په وینا، د هلکانو او نجونو لپاره د زده کړو برابر پراختیا د افغانستان د ټولنې له بنسټیزو اړتیاوو څخه ده.

هغه پرته له دې چې د کومې ځانګړې ډلې یا لوري نوم واخلي، زیاته کړه چې د حکومتونو یا سیاسي جریانونو له خوا د زده کړو د اهمیت د معلومولو لپاره څو شاخصونه لیدل کېدای شي؛ لکه دا چې د هغوی د واکمنۍ پر مهال څو ښوونځي جوړ شوي او څو تړل شوي دي، څو پوهنتونونه بند شوي او د پوهنتونونو څومره استادان او علمي کدرونه له هېواده وتلي دي.

دغه افغان سیاسي څېره همدارنګه ټینګار وکړ چې په دولتي ادارو کې غیرمسلکي کسانو ته د دندو سپارل هم د پوهې او لوړو زده کړو د ارزښت نه لرلو څرګندونه کوي؛ هغه اقدام چې د ده په وینا د ځوانانو ترمنځ د زده کړو انګېزه کموي او د هېواد علمي او اقتصادي راتلونکی له ګواښ سره مخ کوي.

حکمتیار د خپل پیغام په دوام کې پر زده کړو د دولت د پراخې پانګونې غوښتنه وکړه او ویې ویل چې هیله لري د افغانستان په هره کوڅه کې ښوونځی موجود وي، زده کړې د ټولو لپاره وړیا او اجباري وي او ټول لګښتونه یې دولت پر غاړه واخلي. هغه همدارنګه ټینګار وکړ چې دندې باید مسلکي او وړ کدرونو ته وسپارل شي.

هغه څو ورځې وړاندې، د مارچ په پنځمه هم په همدې ټولنیزه شبکه کې په بل پیغام کې لیکلي وو چې نږدې درې لسیزې کېږي چې گلبدین حکمتیار، د حزب اسلامی افغانستان مشر، د خپل وخت ډېره برخه له کمپیوټر سره د مطالعې، څېړنې او لیکنې په چارو کې تېروي. نوموړي د طالبان د مشرانو هغو لیدلورو ته په اشارې چې د انټرنېټ، ټلویزیون او ګرځنده ټېلفون په څېر اسانتیاوو په اړه لري، نیوکه وکړه او دا یې د ټولنې د علمي پرمختګ پر وړاندې خنډ وباله.

حکمتیار په خپل پیغام کې د قرآن کریم د دې آیت («وَأَن لَّيْسَ لِلْإِنسَانِ إِلَّا مَا سَعَى») په یادولو سره ټینګار وکړ چې د ملتونو پرمختګ د هغوی د هڅو او کوښښونو پایله ده، او د اسلامي ټولنو شاته پاتې کېدل هم تر ډېره د علم، څېړنې او ګډو هڅو د کمښت له امله رامنځته شوي دي.