سیاست

محسن رضايي: له امریکا سره احتمالي هوکړه د کنګل شویو شتمنیو له خوشې کېدو سره تړلې ده

اشتراک گذاری:

بریانیوز- شنبه، ١٦ جوزا ١٤٠٥

د ایران د ستر مشر د پوځي سلاکار ویلي چې د تهران او واشنګټن ترمنځ د احتمالي هوکړې یو مهم شرط د امریکا له لوري د ایران د ۲۴ میلیاردو ډالرو کنګل شویو شتمنیو خوشې کول دي

رضايي له سي‌اېن‌اېن سره په خبرو کې ویلي چې ایران غواړي د هرې احتمالي هوکړې د لاسلیک پر مهال ۱۲ میلیارده ډالر خوشې شي او پاتې ۱۲ میلیارده ډالر په راتلونکو پړاوونو کې ایران ته وسپارل شي

د هغه په وینا، د دغو شتمنیو خوشې کېدل د تهران او واشنګټن ترمنځ د باور د فضا د رامنځته کولو لپاره مهم ګام ګڼل کېږي او د هر ډول تفاهم د بریا لپاره بنسټیز ارزښت لري

رضايي خبرداری ورکړی چې که جګړې بیا پیل شي، شخړه به یوازې د فارس خلیج تر سیمې محدوده پاتې نه شي، بلکې ښايي د سره سمندر، باب‌المندب تنګي، مدیترانې سمندر او د هند سمندر تر سیمو هم وغځېږي

هغه همدارنګه د امریکا د ولسمشر او د ایران د ستر مشر ترمنځ د احتمالي لیدنې احتمال رد کړی او ویلي یې دي چې د دواړو هېوادونو ترمنځ خبرې اترې اوس مهال له ځنډ او خنډ سره مخ دي

د رضايي څرګندونې په داسې وخت کې مطرح کېږي چې د ایران د اټومي پروګرام، بندیزونو او سیمه‌ییز امنیت په اړه د تهران او واشنګټن ترمنځ اختلافات لا هم پر خپل ځای پاتې دي او د هر ډول نوې هوکړې په اړه بحثونه دوام لري