کاناډا په ملګرو ملتونو کې د افغانستان د ملګرو ډلې غونډه راوبلله

اشتراک گذاری:

بریانیوز- شنبه، ١٦ جوزا ١٤٠٥

په ملګرو ملتونو کې د کاناډا استازولۍ ویلي چې د افغانستان د ملګرو ډلې غونډه یې رابللې وه، څو د افغانستان د روان وضعیت په اړه هر اړخیز بحث او ارزونه ترسره شي

د استازولۍ د معلوماتو له مخې، په دې غونډه کې د افغانستان لپاره د ملګرو ملتونو مرستندویه پلاوي (یوناما) او د سره صلیب نړیوالې کمېټې استازو ګډون کړی و او د افغانستان د سیاسي، اقتصادي او بشري وضعیت په اړه یې معلومات وړاندې کړل

په غونډه کې همدارنګه د بشري حقونو د وضعیت، بشري اړتیاوو، اقتصادي ننګونو او د هېواد د اوسنیو شرایطو په اړه بحثونه وشول، څو ګډونوال وکولای شي د افغانستان د روان حالت په اړه روښانه انځور ترلاسه کړي

د کاناډا استازولۍ ویلي چې د دغسې غونډو موخه د افغانستان د مسئلو په اړه د نړیوالې ټولنې د پاملرنې ساتل او د اړوندو موضوعاتو په اړه د نظرونو تبادله ده

شنونکي باور لري چې د افغانستان د ملګرو ډلې غونډې د نړیوالو بنسټونو او هېوادونو لپاره د همغږۍ یو مهم چوکاټ برابروي، چې له لارې یې د افغانستان د سیاسي، اقتصادي او بشري وضعیت په اړه معلومات شریکېږي او د راتلونکو اقداماتو په اړه سلا مشورې کېږي

دا غونډه په داسې وخت کې ترسره شوې چې افغانستان لا هم له اقتصادي ستونزو، بشري اړتیاوو او ګڼو ټولنیزو ننګونو سره مخ دی او نړیوال بنسټونه د وضعیت له نږدې څارنې خبرې کوي