شهباز شریف: پاکستان او امریکا د نږدې ملګرتیا اوږد تاریخ لري

اشتراک گذاری:

بریانیوز- شنبه، ١٦ جوزا ١٤٠٥

د پاکستان لومړي وزیر په اسلام‌اباد کې د امریکا د خپلواکۍ د ۲۵۰مې کلیزې د نمانځنې په مراسمو کې ویلي چې پاکستان او امریکا د اوږدې مودې راهیسې نږدې اړیکې او همکاري لري

شهباز شریف په خپلو څرګندونو کې د دواړو هېوادونو ترمنځ د سیاسي، اقتصادي او امنیتي همکاریو یادونه کړې او ویلي یې دي چې اسلام‌اباد او واشنګټن په بېلابېلو برخو کې ګډ کار کړی دی

نوموړي همدارنګه د پاکستان او هند ترمنځ وروستیو ترینګلتیاوو ته په اشارې ویلي چې پاکستان د سیمې د سولې او ثبات ملاتړ کوي او د شخړو د پراخېدو مخنیوی مهم ګڼي

هغه ادعا کړې چې د ځینو پوځي اقداماتو د نه پراخېدو پرېکړه د سیمې د ثبات او د پراخې جګړې د مخنیوي لپاره شوې وه. خو د دغو څرګندونو په اړه د هند له لوري کوم رسمي غبرګون نه دی خپور شوی

شنونکي باور لري چې د پاکستان او امریکا اړیکې، سره له دې چې په بېلابېلو پړاوونو کې له لوړو ژورو سره مخ شوې، لا هم د دواړو هېوادونو د بهرنۍ تګلارې مهمه برخه ګڼل کېږي

دا څرګندونې په داسې وخت کې مطرح کېږي چې پاکستان د امریکا سره د اقتصادي، سوداګریزو او امنیتي همکاریو د پراختیا هڅې روانې ساتلې دي، او په سیمه کې د امنیتي بدلونونو له امله د دواړو هېوادونو اړیکې بیا د پام وړ ګرځېدلې دي