سیاست

د ټرمپ په امر پر ایران د امریکا بریدونه؛ د هرمز تنګي شاوخوا کړکېچ لا پسې تود شو

اشتراک گذاری:

بریانیوز- پنجشنبه، ۲۱ جوزا١٤٠۵

د امریکا مرکزي قومندانۍ اعلان کړی چې د ولسمشر ډونلډ ټرمپ په مستقیم امر یې د ایران پر ځینو مهمو هدفونو پوځي بریدونه پیل کړي دي

هم‌ مهاله ایراني رسنیو راپور ورکړی چې د بندر عباس په ګډون د هېواد په څو سیمو کې د زورورو چاودنو غږونه اورېدل شوي او د بریدونو له امله امنیتي وضعیت ترینګلی شوی دی

د لومړنیو راپورونو له مخې، د امریکا دغو عملیاتو د ایران په سوېلي سیمو کې یو شمېر پوځي او ستراتیژیک ځایونه په نښه کړي، خو تر اوسه د بریدونو د پایلو او اوښتو زیانونو په اړه بشپړ معلومات نه دي خپاره شوي

بل لور ته، راپورونه وایي چې ایراني ځواکونو د دغو بریدونو په ځواب کې د هرمز تنګي ته نږدې پر امریکایي سمندري بېړیو توغندیز بریدونه کړي دي. د دغو ادعاوو په اړه لا تر اوسه خپلواکه ارزونه نه ده شوې او دواړو لورو بشپړ جزییات نه دي خپاره کړي

دغه پرمختګ د امریکا او ایران ترمنځ روان کړکېچ یو نوي او خطرناک پړاو ته داخلوي؛ داسې پړاو چې د سیمې امنیت، نړیوالې سوداګرۍ او د انرژۍ بازارونو ته یې اندېښنې زیاتې کړې دي

شنونکي خبرداری ورکوي چې که د دواړو هېوادونو ترمنځ پوځي غبرګونونه دوام ومومي، د هرمز تنګي شاوخوا وضعیت به لا پسې پېچلی شي او د منځني ختیځ د پراخې بې‌ثباتۍ خطر به ډېر کړي