مقاله

پاکستان د پوځي چورلکې د لوېدو پخلی وکړ؛ په کشمیر کې ناکرارۍ دوام لري

اشتراک گذاری:

بریانیوز- پنجشنبه، ۲۱ جوزا١٤٠۵

پاکستاني چارواکو منلې چې نن د دوی تر ولکې لاندې کشمیر کې یوه روسي جوړې شوې ايم -۱۷ چورلکه لوېدلې او ټول سپاره کسان پکې وژل شوي دي

تر اوسه د چورلکې د لوېدو د لامل په اړه رسمي او بشپړ معلومات نه دي ورکړل شوي، خو امنیتي ادارو د پېښې د څېړنې خبر ورکړی دی

دغه پېښه په داسې وخت کې رامنځته شوې چې د پاکستان تر ادارې لاندې کشمیر کې د حکومت ضد اعتراضونه او ولسي خوځښتونه زور اخیستی دی

د راپورونو له مخې، په بېلابېلو سیمو کې کاربندیز روان دی او زرګونو خلکو د خپلو غوښتنو د مطرح کولو لپاره احتجاجي غونډې جوړې کړې دي

سرچینې وایي، شاوخوا ۱۲ زره کسانو د میرپور په عیدګاه چوک کې پرلت وهلی او د خپلو سیاسي او اقتصادي غوښتنو د منلو غوښتنه کوي اعتراض کوونکي ادعا کوي چې له اوږدې مودې راهیسې د بېلابېلو ستونزو له امله له فشارونو سره مخ دي، او غواړي چې اړوند چارواکي د هغوی غوښتنو ته عملي ځواب ووایي

شنونکي وایي، د کشمیر وروستي تحولات د سیمې د امنیتي او سیاسي وضعیت حساسیت نور هم زیاتوي، په ځانګړي ډول په داسې حال کې چې ولسي اعتراضونه او امنیتي پېښې په یوه وخت کې رامنځته کېږي تر اوسه د چورلکې د لوېدو او روانو اعتراضونو ترمنځ د کوم مستقیم تړاو په اړه رسمي معلومات نه دي خپاره شوي