مقاله

مزارشریف کې اورلګېدنه؛ نږدې اته سوه زره افغانۍ مالي زیان اوښتی

اشتراک گذاری:

بریانیوز- جمعه ، ۲۲ جوزا١٤٠۵

د بلخ ولایت د مرکز مزارشریف ښار په نهمه ناحیه کې د خبریالانو څلورلارې ته څېرمه د اورلګېدنې یوې پېښې نږدې اته سوه زره افغانۍ مالي زیان اړولی دی

د بلخ امنیه قومندانۍ په خپره کړې خبرپاڼه کې ویلي چې یاده اورلګېدنه د اوروژنې د ډلو د چټکو او پر وخت هڅو له امله مهار شوې او د اور د پراخېدو مخه نیول شوې ده

که اور پر وخت نه وای کابو شوی، ښايي شاوخوا پنځه میلیونه افغانۍ نور مالي زیانونه هم رامنځته شوي

ځايي چارواکي وایي چې د اوروژنې ځواکونو د پېښې سیمې ته له رسېدو وروسته د اور لمبې مهار کړې او د نږدې ودانیو او سوداګریزو ځایونو د خوندي پاتې کېدو لپاره یې بېړني ګامونه پورته کړل

تر اوسه د اورلګېدنې د لامل او د احتمالي زیانمنو شویو کسانو په اړه نور جزییات نه دي خپاره شوي، خو اړوندې ادارې د پېښې د څرنګوالي په اړه پلټنې روانې ساتلي دي