ورزش

ورزش: افغان او قزاق چارواکو د ورزشي همکاریو پر پراختیا ټینګار وکړ؛ د افغان پهلوانانو لپاره د نوي تمریني کمپ ژمنه

اشتراک گذاری:

بریانیوز- چهار شنبه ۳ سرطان ١٤٠٥

کابل – د فني او روزنیزو کورسونو له بریالۍ بشپړېدو وروسته، د افغانستان د المپیک ملي کمېټې سرمنشي د قزاقستان د المپیک کمېټې له عمومي رییس سره کتلي او د دواړو هېوادونو ترمنځ یې د ورزشي همکاریو پر پراختیا خبرې کړې دي

د معلوماتو له مخې، په دې لیدنه کې د افغانستان د پهلوانۍ فدراسیون د پرمختګ، د ورزشکارانو د روزنې او د تخنیکي وړتیاوو د لوړولو په اړه هر اړخیز بحثونه ترسره شوي دي

دواړو لورو هوکړه کړې چې د افغانستان د پهلوانۍ فدراسیون ملاتړ به نور هم پراخ کړي او افغان ورزشکارانو او روزونکو ته به د روزنیزو فرصتونو زمینه برابره کړي. د همدې هوکړې له مخې، ټاکل شوې ده چې په نږدې راتلونکي کې یو شمېر افغان ورزشکاران او روزونکي د بل تمریني کمپ لپاره قزاقستان ته سفر وکړي

ورزشي چارواکي باور لري چې دغه روزنیز کمپونه به د افغان ورزشکارانو د تخنیکي او مسلکي وړتیاوو په پیاوړتیا کې مهم رول ولوبوي او هغوی به د ۲۰۲۶ کال د اکتوبر په نړۍوالو سیالیو کې د غوره ګډون لپاره لا ښه چمتو کړي

دا پرمختګ په داسې حال کې رامنځته کېږي چې د افغانستان ورزش په وروستیو کلونو کې له ګڼو ننګونو سره مخ و، خو نړیوالې او سیمه‌ییزې همکارۍ د افغان ورزشکارانو لپاره د پرمختګ او سیالۍ نوې هیلې راژوندۍ کړې دي