ملګري ملتونه: په افغانستان کې بشري او اقتصادي بحران د انسان قاچاق خطر زیاتوي

ملګري ملتونه: په افغانستان کې بشري او اقتصادي بحران د انسان قاچاق خطر زیاتوي

 بریانیوز/ جمعه  ( ۹ / اسد /۱۴۰۵هـ.ش)

ملګرو ملتونو خبرداری ورکړی چې په افغانستان کې روان بشري او اقتصادي بحرانونه د انسان قاچاق او د خلکو د استثمار خطرونه زیات کړي دي. د دغه سازمان په وینا، له ګاونډیو هېوادونو د افغانانو جبري ستنېدل او د عایداتي فرصتونو کمېدل د دې لامل شوي چې ډېر افغانان د قاچاقبرانو او استثمار کوونکو په دام کې ولوېږي

د انسان قاچاق پر وړاندې د نړیوالې ورځې په مناسبت، د ملګرو ملتونو د نشه‌يي توکو او جرمونو پر وړاندې ادارې  او د کډوالۍ نړیوال سازمان  په ګډه اعلامیه کې ویلي، چې د افغانانو پراخ جبري بېرته ستنېدل، د کوکنارو د کښت له کمېدو وروسته د کلیوالي اقتصاد کمزوري کېدل، د بشري مرستو کمښت، طبیعي پېښې او پر ښځو او نجونو محدودیتونه هغه عوامل دي چې د انسان قاچاق خطر یې ډېر کړی دی

د دغو ادارو د معلوماتو له مخې، د بېرته ستنېدونکو افغانانو د وضعیت په یوې وروستۍ ارزونه کې څرګنده شوې چې یوازې ۱۱ سلنه ستنېدونکو ثابت کار یا شخصي سوداګري لري، په داسې حال کې چې ۵۶ سلنه کورنۍ د خپلو لومړنیو اړتیاوو د پوره کولو توان نه لري

راپور زیاتوي چې نږدې نیمایي بېرته ستنېدونکي د ژوند د دوام لپاره پر پورونو او مالي مرستو تکیه کوي، چې دا حالت خلک جبري کار، د پورونو غلامۍ او نورو ناوړه ګټه اخیستونکو شرایطو ته نږدې کوي

د ملګرو ملتونو ادارو ویلي، د انسان قاچاق قربانیان په ناامنو کارونو، جبري مزدورۍ، جنسي استثمار، د غلامۍ ورته شرایطو او حتی د بدن د غړو په جبري اخیستلو کې ښکېلېږي. د ښځو، ماشومانو، بېرته راستنېدونکو او پورونو کې ښکېلو کورنیو د زیانمنېدو خطر تر نورو ډېر بلل شوی دی

د راپور له مخې، یو شمېر کسان په کورنیو کارونو، کرنه، خښتو بټیو، کانونو او قالین اوبدلو کې په جبري ډول کار ته اړ کېږي، او ځینې نور د جبري سوالګرۍ، اجباري ودونو، د ماشومانو د استخدام او نورو ناوړه کړنو قرباني کېږي

د ملګرو ملتونو چارواکو همداراز د انسان قاچاق د یوې نوې بڼې په اړه خبرداری ورکړی، چې پکې قربانیان د انلاین درغلیو او نورو غیرقانوني فعالیتونو لپاره په زور کارول کېږي

په افغانستان کې د ملګرو ملتونو د نشه‌يي توکو او جرمونو ادارې استازي پولیاک اوک سري ویلي، د خلکو اوسني فشارونه، لکه پراخې ستنېدنې، د عایداتي سرچینو کمښت، د مرستو کمېدل، طبیعي ناورینونه او پر ښځو محدودیتونه، د انسان قاچاق او استثمار ته د خلکو د زیانمنېدو کچه لوړه کړې ده

د کډوالۍ نړیوال سازمان د افغانستان مشرې میهیونګ پارک ویلي، د افغان کډوالو د ستنېدو کچه د ټولنو له وړتیا لوړه شوې او پرته له نړیوال ملاتړ څخه به ډېری کورنۍ د کار، سرپناه او لومړنیو خدمتونو له کمښت سره مخ شي

ملګرو ملتونو ټینګار کړی چې د انسان قاچاق د مخنیوي لپاره باید د قربانیانو د پېژندنې، ملاتړ، خوندي کډوالۍ لارو او د عایداتي فرصتونو د رامنځته کولو په برخه کې ګډې هڅې زیاتې شي