افغانستان : د ماین‌پاکۍ نوې هڅې؛ ماشومان لا هم د ناچاودو توکو قرباني کېږي

اشتراک گذاری:

(بریانیوز شنبه (۲۸/ سنبله /۱۴۰۵هـ.ش

افغانستان او د ډنمارک د کډوالو شورا د ماینونو او جګړو له پاتې شویو ناچاودو توکو د پاکولو لپاره د څه باندې څلور میلیونه ډالرو په ارزښت دوه هوکړې لاسلیک کړې دي

د دغو هوکړو له مخې، ټاکل شوې په ۱۳ ولایتونو کې سلګونه زره متره مربع ځمکه له ماینونو او ناچاودو مهماتو پاکه شي. همداراز به زرګونو کسانو ته د دغو چاودېدونکو توکو د خطرونو او د ځان ساتنې په اړه پوهاوی ورکړل شي

د ماین‌پاکۍ په دې پروګرامونو کې د هغو سیمو پاکولو ته ځانګړې پاملرنه کېږي چې خلک پکې هره ورځ تګ راتګ کوي او یا یې ځمکې د کرنې او نورو اقتصادي فعالیتونو لپاره کارول کېږي

دا هوکړې په داسې مهال لاسلیک کېږي چې افغانستان لا هم د تېرو جګړو له امله له ماینونو او ناچاودو مهماتو سره مخ دی. د دغو توکو پاتې شوني هر کال د هېواد په بېلابېلو سیمو کې د ملکي وګړو، په ځانګړي ډول ماشومانو، ژوند اخلي او ګڼ نور کسان ټپیانوي

د ماین‌پاکۍ ادارې ټینګار کوي چې د خطرناکو سیمو پاکول او د خلکو پوهاوی کول د ملکي وګړو د ژوند ژغورلو لپاره مهم دي، خو د هېواد د پراخو ماین‌لړلو سیمو د بشپړ پاکولو لپاره لا هم پراخو مالي او تخنیکي مرستو ته اړتیا ده