مقاله

جاپان د راستنېدونکو افغان کډوالو د ملاتړ لپاره دوه میلیونه ډالره مرسته وکړه

اشتراک گذاری:

بریانیوز:(پنجشنبه،۲۱ حوت۱۴۰۴)

د ملګرو ملتونو د کډوالو عالي کمېشنري (یو این ایچ سي آر) اعلان کړی چې جاپان له ایران او پاکستان څخه د بېرته راستنېدونکو افغان کډوالو او په افغانستان کې د اغېزمنو کوربه ټولنو د ملاتړ لپاره دوه میلیونه ډالره مرسته کړې ده

د یادې ادارې په وینا، د دې مالي مرستې اساسي موخه دا ده چې له ګاونډیو هېوادونو څخه بېرته ستنېدونکو افغانانو ته بېړنۍ بشري مرستې ورسول شي او همدارنګه هغو کوربه ټولنو ته لاسنیوی وشي چې د اقتصادي ستونزو له سخت فشار سره مخ دي

د یو این ایچ سي آر چارواکو ویلي چې دا مرسته به د سرپناه، لومړنیو توکو، روغتیايي خدمتونو او نورو اړینو بشري مرستو د برابرولو لپاره ولګول شي، څو راستنېدونکي کډوال وکولای شي د ژوند لومړنۍ اړتیاوې پوره کړي

یادې ادارې ټینګار کړی چې افغانستان دا مهال د کډوالو د بېرته ستنېدو د بې‌سارې څپې له امله له سخت بشري بحران سره مخ دی. د راپور له مخې، په لنډ وخت کې د زرګونو افغانانو راستنېدل د هېواد پر اقتصادي او ټولنیزو سرچینو لوی فشار اچولی دی

شنونکي وایي که نړیواله ټولنه د افغانستان د بشري وضعیت د ښه کېدو لپاره خپلې مرستې زیاتې نه کړي، نو ښايي د راستنېدونکو کډوالو ستونزې نورې هم پراخې شي او د هېواد کمزوری اقتصادي وضعیت به لا پسې خراب شي