اروپايي ټولنه: له ۱۹۹۴ کال راهیسې مو له افغانستان سره دوه میلیارده یورو بشري مرستې کړې دي

اروپايي ټولنه: له ۱۹۹۴ کال راهیسې مو له افغانستان سره دوه میلیارده یورو بشري مرستې کړې دي

(بریانیوزجمعه (۸/ عـقـرب/۱۴۰۵هـ.ش

اروپايي ټولنې د ملګرو ملتونو د عمومي اسامبلې د درېیمې کمېټې په غونډه کې له افغانانو، په افغانستان کې د ملګرو ملتونو د مرستندوی ماموریت (یوناما) او د بشري حقونو د سرغړونو په تړاو د حساب ورکونې له هڅو څخه د خپل ملاتړ پر دوام ټینګار کړی دی

اروپايي ټولنې ویلي، له ۱۹۹۴ میلادي کال راهیسې یې افغانستان ته شاوخوا دوه میلیارده یورو بشري مرستې برابرې کړې دي. د دغو مرستو له ډلې ۳۲۰ میلیونه یورو یوازې په ۲۰۲۴ او ۲۰۲۵ کلونو کې ځانګړې شوې دي

دغه ټولنې د غونډې په پای کې د نړیوالو لارو چارو پر جوړولو ټینګار کړی، څو د افغانانو، په ځانګړې توګه د ښځو او ځوانانو، حقونه خوندي شي او هغوی وکولای شي د خپل هېواد د راتلونکي او برخلیک په ټاکلو کې ونډه ولري

اروپايي ټولنې د بشري حقونو د سرغړونو په اړه د حساب ورکونې پر اړتیا هم ټینګار کړی او ویلي یې دي چې په دې برخه کې باید نړیوالې هڅې دوام ومومي

بل لور ته، د افغانستان اسلامي امارت تر دې وړاندې ویلي چې په هېواد کې د بشري حقونو تامین د اسلامي شریعت په چوکاټ کې تر بل هر وخت ښه شوی دی. د اسلامي امارت چارواکي د خپلو دریځونو په دفاع کې د شریعت پر احکامو ټینګار کوي، خو د ښځو او نجونو د زده‌کړو، کار او ټولنیز مشارکت په اړه یې محدودیتونه د نړیوالو بنسټونو او د بشري حقونو د سازمانونو له نیوکو سره مخ دي