سیاست

لیندسي ګراهام: ټرمپ د هرمز تنګي لپاره بدیل نظامي او اقتصادي پلان لري

اشتراک گذاری:

بریانیوز- دوشنبه ۱ سرطان ١٤٠٥

د امریکا د سنا جرګې غړي، سناتور ليندسي ګراهام ویلي چې د امریکا ولسمشر ډونالډ ټرمپ د ایران سره د مذاکراتو د ناکامېدو په صورت کې د هرمز تنګي په اړه د یوې بدیلې تګلارې په لټه کې دی

ګراهام په یوه مرکه کې له شبکې سره څرګنده کړې چې هغه د جمعې په ورځ څو ساعته له ټرمپ سره لیدلي او د همدې لیدنې پر مهال د امریکا د احتمالي راتلونکو اقداماتو په اړه بحث شوی دی

د هغه په وینا، ټرمپ د داسې پلان یادونه کړې چې که له ایران سره ډیپلوماټیکې هڅې پایلې ته ونه رسېږي، نو واشنګټن به د هرمز تنګي د تګ راتګ پر کنټرول او تنظیم باندې سخت اقدامات وکړي، چې پکې د نظامي حضور د زیاتولو احتمال هم شامل دی

ګراهام زیاته کړې چې د دې طرحې له مخې کېدای شي د دې ستراتیژیکې اوبو لارې څخه د تېرېدونکو کښتیو لپاره ځانګړې فیس یا لګښت وضع شي، او ترلاسه کېدونکي عواید به د امنیتي عملیاتو د لګښتونو لپاره وکارول شي

دا څرګندونې په داسې حال کې مخې ته راغلي چې د امریکا او ایران ترمنځ ډیپلوماټیکې خبرې لا هم روانې دي او هڅې کېږي چې د سیمه‌ییزو تاوتریخوالو د زیاتېدو مخه ونیول شي. تر اوسه سپینې ماڼۍ او ایراني لوري د دغو ادعاوو په اړه رسمي دریځ نه دی څرګند کړی