افغانستان او ایرلنډ د پنځوس اوریزو سیالیو لړۍ پیلوي؛ د لومړۍ بریا لپاره به سیالي کوي

افغانستان او ایرلنډ د پنځوس اوریزو سیالیو لړۍ پیلوي؛ د لومړۍ بریا لپاره به سیالي کوي

 بریانیوز/چهارشنبه  ( ۱۴ / اسد /۱۴۰۵هـ.ش)

 د افغانستان کرکټ ملي لوبډله نن د شمالي ایرلنډ په بریډي کرکټ لوبغالي کې د ایرلنډ پر وړاندې د پنځو یو ورځنیو سیالیو د لړۍ لومړۍ لوبه ترسره کوي

دا سیالۍ د ۲۰۲۷ کال د نړیوال جام لپاره د دواړو لوبډلو د چمتووالي د لړۍ یوه برخه ده، چې دواړه ټیمونه غواړي په دې پړاو کې خپل ترکیبونه وازمويي او د راتلونکو مهمو سیالیو لپاره چمتووالی ونیسي

افغانستان په وروستیو کلونو کې په پنځوس اوریزو سیالیو کې د پام وړ پرمختګ کړی او په دې لوبه کې به هڅه وکړي چې پر ایرلنډ خپله برلاسي وساتي. د افغانستان لوبډله د رحمت شاه په لوبډلمشرۍ او له یوې تجربه‌کارې لوبډلې سره میدان ته ښکته کېږي

بل لور ته ایرلنډ، چې د خپلې کورنۍ لوبغالي او شرایطو څخه ګټه اخلي، غواړي د سیالیو لړۍ په بریا پیل کړي او د افغانستان پر وړاندې قوي دریځ وښيي

ټاکل شوې چې دا لوبه د کابل پر وخت د ماسپښین په ۱:۳۰ بجو پیل شي. د هوا د وړاندوینې له مخې، اسمان به ورېځمن وي او د لږ باران امکان هم شته؛ خو تمه ده چې که باران وشي، د لوبې د اوږدې ځنډېدو سبب به نه شي

د لوبغالي شرایط ښايي د لوبې په لومړیو کې د تېزو توپ اچوونکو لپاره مناسب وي، خو د وخت په تېرېدو به د توپ‌وهنې لپاره لا ښه شي

دواړه لوبډلې به هڅه وکړي چې د لړۍ لومړۍ بریا ترلاسه کړي او د پنځوس اوریزو سیالیو په دې مهم پړاو کې خپل دریځ پیاوړی کړي