د بېرته راستنېدونکو کډوالو لپاره د وېشل شویو ځمکو شمېر له ۶۵ زرو واوښت

اشتراک گذاری:

بریانیوز/چهارشنبه ( ۱۴ / اسد /۱۴۰۵هـ.ش)

د طالبانو د حکومت د ښار جوړونې او کور جوړونې وزارت وایي، په ټول هېواد کې بېرته راستنېدونکو کډوالو کورنیو ته د وېشل شویو استوګنیزو ځمکو شمېر ۶۵ زره او ۱۵۴ نمرو ته رسېدلی دی

د دغه وزارت په خبرپاڼه کې ویل شوي، یوازې د دوشنبې په ورځ، د زمري په ۱۲مه، د ننګرهار، پکتیکا، نیمروز، فاریاب او بامیان ولایتونو کې ۱۱۶۳ کورنیو ته د استوګنې ځمکې وېشل شوې دي

د ښار جوړونې او کور جوړونې وزارت زیاتوي چې د بېرته راستنېدونکو کډوالو لپاره د استوګنیزو ځمکو د وېش بهیر د دایمي استوګنې او ځمکو وېش کمېټې له لوري د هېواد په بېلابېلو ولایتونو کې لا هم روان دی

دغه وزارت وایي، د ځمکو د وېش موخه بېرته راستنېدونکو کورنیو ته د دایمي استوګنې زمینه برابرول او د هغوی د کور جوړونې ستونزې کمول دي

په وروستیو میاشتو کې له ګاونډیو هېوادونو د افغان کډوالو د ستنېدو بهیر چټک شوی، چې له امله یې د راستنېدونکو کورنیو د سرپناه اړتیاوې هم زیاتې شوې دي