سیاست

تهران : ایران خبرداری ورکړ: که امریکا بیا برید وکړي، د خلیج هېوادونو د انرژۍ تاسیسات به په نښه کړو

اشتراک گذاری:

بریانیوز/ پنجشنبه ( ۱۵ / اسد /۱۴۰۵هـ.ش)

تهران – ایران خبرداری ورکړی، که متحده ایالات یو ځل بیا پر ایراني خاوره پوځي برید وکړي، تهران به د خلیج د هېوادونو مهم د انرژۍ تاسیسات په نښه کړي

د رویټرز د راپور له مخې، پنځو باخبره سرچینو ویلي، ایران دغه پیغام د سیمې هېوادونو ته رسولی او هڅه کوي د امریکا د هر ډول نوي پوځي اقدام لګښت لوړ کړي، څو د واشنګټن نږدې سیمه‌ییز متحدان هم د احتمالي شخړې له پایلو خوندي پاتې نه شي

د راپور له مخې، ایران باور لري چې د خلیج هېوادونو د تېلو او ګازو پر مهمو تاسیساتو هر ډول برید به د نړیوالې انرژۍ بازار او سیمه‌ییز امنیت له جدي ګواښ سره مخ کړي

دغه خبرداری داسې مهال ورکول کېږي چې د امریکا او ایران ترمنځ کړکېچ لا هم دوام لري او د دواړو هېوادونو ترمنځ د خبرو اترو ترڅنګ د پوځي شخړې احتمال هم په بشپړ ډول له منځه نه دی تللی

تر اوسه سپینې ماڼۍ او د خلیج ډېری هېوادونو د ایران د دې خبرداري په اړه رسمي غبرګون نه دی ښودلی