مقاله

یارن : ناورو د ۹۰ زره ډالرو په بدل کې تابعیت ورکوي؛ د اقلیمي بحران د مخنیوي لپاره نوې طرحه

اشتراک گذاری:

بریانیوز/ پنجشنبه ( ۱۵ / اسد /۱۴۰۵هـ.ش)

یارن – د ارام سمندر کوچني ټاپوییز هېواد ناورو د پانګونې په بدل کې د تابعیت ورکولو نوی پروګرام پیل کړی دی. د دغه هېواد چارواکي وایي، د دې پروګرام اصلي موخه د اقلیمي بدلونونو پر وړاندې د مبارزې لپاره د مالي سرچینو برابرول او د سمندر د اوبو د لوړېدو له ګواښ سره د مخامخ خلکو خوندي سیمو ته لېږدول دي

د دې پروګرام له مخې، بهرني غوښتونکي له امنیتي او مالي ارزونې وروسته کولای شي د ۹۰ زره امریکایي ډالرو په ورکولو د ناورو تابعیت او پاسپورټ ترلاسه کړي. دا فیس په لنډمهاله توګه له ۱۱۵ زره ډالرو څخه راکم شوی دی

د ناورو حکومت وایي، د دغه هېواد د پاسپورټ لرونکي کولای شي له ویزې پرته یا د رسېدو پر مهال د ویزې په ترلاسه کولو له ۸۵ څخه زیاتو هېوادونو او سیمو ته، چې سینګاپور او هانګ‌کانګ هم پکې شامل دي، سفر وکړي. خو چارواکي ټینګار کوي چې تابعیت د ځمکې د پېرلو حق نه ورکوي او د ځمکو د مالکیت قوانین به پر خپل حال پاتې وي

د حکومت په وینا، د دې پروګرام ټول عواید به د اقلیمي بدلونونو پر وړاندې د ساتنې، د بنسټیزو پروژو او د خلکو د خوندي مېشتېدو لپاره ولګول شي

ناورو، چې یوازې شاوخوا ۲۱ مربع کیلومتره مساحت لري، د سمندر د اوبو د کچې له لوړېدو او د فاسفیټ د پراخې کان‌کېندنې له امله له جدي چاپېریالي ستونزو سره مخ دی. چارواکي وایي، د هېواد د ډېری کورنیو او بنسټیزو تأسیساتو لوړو سیمو ته د لېږد لومړی پړاو له ۶۰ میلیونه ډالرو څخه ډېره بودجه غواړي

سره له دې، دغه پروګرام له نیوکو هم خوندي نه دی. یو شمېر امنیتي کارپوهان خبرداری ورکوي چې د پانګونې په بدل کې د تابعیت ورکولو پروګرامونه، که سختې څارنې ونه لري، د ناوړه ګټې اخیستنې خطر زیاتوي

د ناورو حکومت وایي، ټول غوښتونکي به له سختو امنیتي او مالي ارزونو تېرېږي او که د کوم کس د درنو جرمونو ثبوت وموندل شي، تابعیت به یې لغوه شي

د راپورونو له مخې، د دې پروګرام له پیل راهیسې تر اوسه له ۱۲۰ ډېر کسان د ناورو تابعیت ترلاسه کړی دی. چارواکي دا طرحه د اقلیمي بحران پر وړاندې د مالي سرچینو د برابرولو یوه مهمه وسیله بولي، خو منتقدان لا هم د تابعیت او پانګونې د تړاو په اړه خپلې اندېښنې څرګندوي