مقاله

مزارشریف: ایټالیا او یونسکو د مزارشریف د روضې جومات د بیارغونې بېړنۍ پروژه پیل کړه

اشتراک گذاری:

بریانیوز/ پنجشنبه ( ۱۵ / اسد /۱۴۰۵هـ.ش)

په افغانستان کې د ایټالیا سفارت اعلان کړی چې دغه هېواد د ملګرو ملتونو د ښوونې، علمي او فرهنګي سازمان (یونسکو) په همکارۍ د مزارشریف د تاریخي روضې جومات د ساتنې او بیارغونې بېړنۍ پروژه پیل کړې ده. دا جومات د وروستۍ زلزلې له امله زیانمن شوی و

د ایټالیا سفارت د پنجشنبې په ورځ په خپلې اېکس پاڼه کې لیکلي، چې د دې پروژې موخه د افغانستان د ارزښتمنو تاریخي او فرهنګي اثارو ساتنه، د زلزلې له امله د اوښتو زیانونو رغول او د سیمه‌ییزو اوسېدونکو لپاره د کاري فرصتونو برابرول دي

د سفارت په وینا، دا پروژه د افغانستان د فرهنګي میراث د خوندي کولو او د افغانانو د ملاتړ لپاره د ایټالیا او ملګرو ملتونو د ګډې ژمنې څرګندونه کوي

د مزارشریف روضه جومات د افغانستان له مشهورو تاریخي او مذهبي ودانیو څخه شمېرل کېږي، چې هر کال زرګونه کورني او بهرني زیارت‌کوونکي او سیلانیان ورڅخه لیدنه کوي او د هېواد د فرهنګي هویت مهمه نښه بلل کېږي