صلاح‌الدین رباني: طالبان له افغانستان سره د «غنیمت شوې ځمکې» په څېر چلند کوي

د جمعیت اسلامي مشر صلاح‌الدین رباني وايي، طالبان له افغانستان سره د «غنیمت شوې ځمکې» په څېر چلند کوي او د نوموړي په وینا، د «سوځېدلې ځمکې سیاست» ته دوام ورکوي.

بریانیوز - دوشنبه ٢٣ سنبله ١٤٠٥

رباني دا څرګندونې د یکشنبې په ورځ، د سنبله په ۲۲مه، د شهید اونۍ په مناسبت په یوه انلاین غونډه کې وکړې. نوموړي وویل، د افغانستان خاورې ته د طالبانو له لوري د غنیمت په سترګه کتل د هېواد د بېلابېلو قومونو ترمنځ د دښمنۍ او بې‌باورۍ د رامنځته کېدو لامل کېږي.

د جمعیت اسلامي مشر د ښځو او نجونو پر زده‌کړو د طالبانو بندیز هم «ناروا، غیرشرعي او غیرانساني سیاست» وباله، خو ټینګار یې وکړ چې د افغانستان اوسنی بحران یوازې د ښځو او نجونو د زده‌کړو له موضوع څخه ډېر پراخ دی او د هېواد له ګڼو سیاسي، اقتصادي او ټولنیزو ستونزو سره تړاو لري.

صلاح‌الدین رباني د افغانستان د کانونو پر استخراج هم نیوکه وکړه او ویې ویل چې طالبان د کانونو د استخراج پر مهال د سیمو د ځايي خلکو حقونه په پام کې نه نیسي. د نوموړي په وینا، د هېواد د طبیعي زېرمو بې‌رویه استخراج د چاپېریالي معیارونو له رعایت پرته ترسره کېږي او دوام یې د کان‌کېندنې په سیمو کې د خلکو راتلونکی له ګواښ سره مخ کولای شي.

رباني په خپلو څرګندونو کې د طالبانو له مخالفو ډلو هم وغوښتل چې پر هغه څه تمرکز وکړي چې د ده په وینا، د ټولو لپاره «ګډ ارمان» دی. نوموړي وویل، هر هغه اقدام چې د طالبانو د مخالفو ډلو ترمنځ د یووالي او همغږۍ د رامنځته کولو لپاره ترسره کېږي، د قدر وړ دی.