سفر

کابل / اسلام آباد: کام ایر او پي‌اې‌اې د افغان مسافرو لپاره د منځني ختیځ سفر اسانه کوي

اشتراک گذاری:

بریانیوز سه شنبه (۲۴/ سنبله /۱۴۰۵هـ.ش)

د افغانستان کام ایر او د پاکستان نړیوال هوايي شرکت «پي‌اې‌اې» د هوايي سفرونو د اسانتیا لپاره د همکارۍ هوکړه کړې چې له مخې به افغان مسافر وکولای شي د اسلام‌اباد له لارې د منځني ختیځ ځینو هېوادونو ته په یوه ساده ترانزیټي سفر کې ولاړ شي

د هوکړې له مخې، مسافر به وکولای شي خپل ټول سفر په یوه ثبت او یوه ټکټ کې ترسره کړي او په اسلام‌اباد کې به اړ نه وي چې خپل ثبت شوی سامان بېرته واخلي او بیا یې ثبت کړي. سامان به له کابله د نښلوونکې الوتنې تر ځایه لېږدول کېږي

د پي‌اې‌اې ویاند عبدالله حفیظ خان ویلي، دغه هوکړه د افغانستان او منځني ختیځ ترمنځ د اسلام‌اباد له لارې د سفر لپاره یوه اسانه ترانزیټي لاره برابروي

د دې هوکړې لومړنی فعال شوی مسیر کابل ـ اسلام‌اباد ـ دمام دی، چې له لارې به افغان مسافر او په خلیجي هېوادونو کې مېشت افغانان د سعودي عربستان ختیځې سیمې ته سفر کولی شي

د هوکړې له مخې، هغه افغان مسافر چې د خلیج هېوادونو پر لور سفر کوي، که په اسلام‌اباد هوايي ډګر کې د ترانزیټ په برخه کې پاتې شي، د پاکستان له کډوالۍ څانګې څخه د تېرېدو اړتیا به ونه لري

د دواړو هوايي شرکتونو پلان دی چې دغه همکاري په دویم پړاو کې مدینې، مسقط او العین ته هم وغځوي، څو د افغان مسافرو، سوداګرو، کارګرو او عمرې یا نورو سفرونو لپاره د هوايي تګ راتګ لارې پراخې شي

دغه هوکړه په داسې وخت کې شوې چې د افغانستان او پاکستان ترمنځ د ځمکني تګ راتګ ستونزو له امله د دواړو هېوادونو ترمنځ هوايي سفر د افغان مسافرو لپاره لا ډېر اهمیت پیدا کړی دی