سیاست

اسلام‌اباد : پاکستان کې د عمران خان خور علیمه خان د ۳۰ ورځو لپاره ونیول شوه

اشتراک گذاری:

(بریانیوز دوشنبه (۳۰/ سنبله /۱۴۰۵هـ.ش

د پاکستان چارواکو د دغه هېواد د پخواني لومړي وزیر عمران خان خور علیمه خان د ۳۰ ورځو لپاره نیولې ده

د چارواکو په وینا، د عليمې خان او د تحریک انصاف ګوند د یوه بل غړي محمد امیر د فعالیتونو په اړه اندېښنه شته او ادعا شوې چې ښايي دواړه د سپټمبر په ۲۷مه د عمران خان د خوشې کېدو په موخه د پلان شوي لاریون پر مهال عامه نظم ګډوډ کړي

تحریک انصاف ګوند غواړي د عمران خان د خوشې کېدو لپاره د روانې میاشتې په ۲۷مه پراخ لاریون ترسره کړي

دغه ګوند ویلي چې د لاریون په درشل کې د پارلمان یو شمېر نور غړي هم نیول شوي دي

د تحریک انصاف له لوري د نیونو پر ضد غبرګون ښودل شوی، خو پاکستاني چارواکي وایي چې د اړوندو کسانو د نیولو موخه د عامه نظم او امنیت ساتنه ده

عمران خان له څه مودې راهیسې په زندان کې دی او د هغه د خوشې کېدو غوښتنه د تحریک انصاف ګوند د سیاسي فعالیتونو له مهمو موضوعاتو څخه ده