لاوروف: داعش خراسان غواړي له افغانستانه منځنۍ اسیا او روسیې ته ترهګریز فعالیتونه وغځوي

د روسیې د بهرنیو چارو وزیر سرګي لاوروف خبرداری ورکړی، چې د داعش خراسان څانګه غواړي له افغانستان څخه د خپلو ترهګریزو فعالیتونو د پراختیا لپاره د اډې په توګه کار واخلي او دغه فعالیتونه منځنۍ اسیا او روسیې ته وغځوي.

بریانیوز- جمعه، ٢٤ میزان ١٤٠٥

لاوروف د جمعې په ورځ، د میزان په ۲۴مه، په مسکو کې د ډله‌ییز امنیت تړون سازمان، د خپلواکو دولتونو مشترک‌المنافع او د شانګهای همکاریو سازمان په ګډه غونډه کې وویل، چې د روسیې او د دغه هېواد د استخباراتي ادارو د ارزونو له مخې، د داعش خراسان ډلې جنګیالي د سیمې لپاره تر ټولو لوی امنیتي ګواښ ګڼل کېږي.

هغه زیاته کړه، چې ترهګرې او افراطي ډلې او د هغوی روزنیز کمپونه لا هم د افغانستان او تاجکستان او همدارنګه د افغانستان او ازبکستان په سرحدي سیمو کې په پام‌وړ کچه شتون لري.

د روسیې د بهرنیو چارو وزیر وویل، چې ترهګر ښايي د کډوالو یا سیلانیانو په جامه کې له افغانستان څخه منځنۍ اسیا ته ننوځي او هلته خپل فعالیتونه پراخ کړي.

لاوروف ټینګار وکړ، چې د داعش خراسان سیمه‌ییزه څانګه په ښکاره هڅه کوي، څو د کابل د واکمنانو هغه وړتیا کمزورې کړي چې په افغانستان کې د ثبات د ساتلو لپاره یې لري. د هغه په وینا، دغه ډله غواړي د افغانستان له خاورې څخه د منځنۍ اسیا هېوادونو او روسیې ته د ترهګریزو فعالیتونو د لېږد لپاره هم کار واخلي.

د روسیې د بهرنیو چارو وزارت تر دې وړاندې ویلي وو، چې د دغو درېیو سازمانونو د غړو هېوادونو استازي، روسي او بهرني کارپوهان او ډیپلوماتان په مسکو کې د سیمې د امنیتي ننګونو، له افغانستان سره د تړلو ګواښونو او د سیمه‌ییزې همکارۍ د پیاوړتیا پر لارو چارو خبرې کوي.

لاوروف تر دې وړاندې هم د افغانستان په اړه د مسکو د اتمې غونډې پر مهال د ترهګرۍ پر وړاندې د مبارزې لپاره له افغانستان سره د تخنیکي، تجهیزاتي او تخصصي مرستو غوښتنه کړې وه.

هغه په هغه غونډه کې ویلي وو، چې د طالبانو امنیتي ځواکونه له داعش او نورو ترهګرو ډلو سره جګړه کوي او سلګونه جنګیالي یې وژلي دي. د لاوروف په وینا، د بهرنیو وګړو او ډیپلوماتیکو استازولیو پر ضد د ترهګریزو بریدونو یو شمېر هڅې هم شنډې شوې دي.