کابل: د افغان ماشومانو د ژوند لپاره نوې هیله: د سوري زړه د درملنې ځانګړی روغتون جوړېږي

اشتراک گذاری:

بریانیوز(شنبه، ۱۲ ثور ۱۴۰۵)

د افغاني سرې میاشتې ټولنه رییس شهاب‌الدین دلاور ویلي چې هڅه کوي په نږدې راتلونکي کې په افغانستان کې د سوري زړه پر ناروغۍ د اخته ماشومانو د درملنې لپاره یو ځانګړی او عصري روغتون جوړ کړي

نوموړي دا څرګندونې د ریچارډ لینډزي، د افغانستان لپاره د برېټانیا له ځانګړي استازي سره په لیدنه کې وکړې. د هغه په وینا، په دې پلان شوي روغتون کې به هر کال شاوخوا ۲۰۰۰ ماشومان د متخصصو ډاکټرانو له خوا تداوي کېږي، چې دا به د زرګونو کورنیو لپاره د ژوند ژغورنې مهم ګام وي

دلاور ټینګار وکړ چې د سوري زړه ناروغي د هغو جدي روغتیايي ستونزو له ډلې ده چې په افغانستان کې ګڼ ماشومان ورسره مخ دي، خو د درملنې امکانات یې محدود دي. هغه وویل، د دې روغتون جوړېدل به نه یوازې د ماشومانو ژوند وژغوري، بلکې د هېواد د روغتیايي سکتور په پیاوړتیا کې به هم مهم رول ولوبوي

په دې لیدنه کې دواړو لورو د کورنیو بې‌ځایه شویو او راستنېدونکو کډوالو پر وضعیت هم خبرې وکړې، او د هغوی د ملاتړ او د بشري مرستو د زیاتوالي پر اړتیا یې ټینګار وکړ. د برېټانیا استازي د بشري مرستو د دوام او د اړمنو خلکو د ملاتړ ژمنه هم تازه کړه

شنونکي وایي، که دا پروژه عملي شي، نو دا به د افغانستان د روغتیا په برخه کې یو مهم پرمختګ وي او د هغو ماشومانو لپاره به د امید نوې دروازه پرانیزي چې د ژوند له ګواښ سره مخ دي