مقاله

دوحه: کابل کې د قطر په نوښت د افغانستان او نړیوالې ټولنې د اړیکو په اړه مهمه ناسته وشوه

اشتراک گذاری:

کابل کې د قطر په نوښت د افغانستان او نړیوالې ټولنې د اړیکو په اړه مهمه ناسته وشوه

بریانیوز-سه شنبه ۲ سرطان ١٤٠٥

کابل – په افغانستان کې د قطر سفارت د افغانستان او نړیوالې ټولنې ترمنځ د اړیکو د پیاوړتیا او د تعامل د نویو لارو چارو د ارزونې په موخه د ګردي مېز یوه مهمه ناسته جوړه کړې ده

په دې ناسته کې د ملګرو ملتونو د استازولۍ، د طالبانو د بهرنیو چارو وزارت او یو شمېر نورو اړوندو بنسټونو استازو ګډون کړی و. ګډونوالو د افغانستان او نړیوالې ټولنې ترمنځ د سیاسي، اقتصادي او بشري همکاریو پر پراختیا، د باور جوړونې پر بهیر او د دوامدار تعامل پر اړتیا بحثونه وکړل

د غونډې پر مهال د افغانستان د اوسني وضعیت، نړیوالو همکاریو او د سیمې د ثبات په تړاو د ګډو هڅو پر اهمیت ټینګار وشو. ګډونوالو وویل چې رغنده تعامل او دوامدارې خبرې اترې کولای شي د افغانستان او نړیوالې ټولنې ترمنځ د واټن د کمېدو او د ګډو ګټو د خوندي کولو لپاره اغېزمن رول ولوبوي

قطر، چې په وروستیو کلونو کې یې د افغانستان په سیاسي او ډیپلوماټیکو چارو کې د منځګړي او تسهیل کوونکي رول لوبولی، یو ځل بیا هڅه کوي د بېلابېلو لورو ترمنځ د تفاهم او همغږۍ لپاره مناسب چاپېریال برابر کړي

دا ناسته په داسې وخت کې ترسره کېږي چې د افغانستان له اوسنیو واکمنو سره د نړیوالې ټولنې د اړیکو، د رسمیت پېژندنې او بشري همکاریو موضوعات لا هم د سیمه‌ییزو او نړیوالو بحثونو په سر کې ځای لري