سیاست

بښنې نړیوال سازمان: پر امید روغتیايي مرکز برید دې د جنګي جرم په توګه وڅېړل شي

اشتراک گذاری:

بریانیوز- پنجشنبه، ۱- اسـد ١٤٠٥

کابل – د بښنې نړیوال سازمان ویلي، د پاکستان له لوري پر امید روغتیايي مرکز د هوايي برید په اړه د شته معلوماتو له مخې، دغه پېښه باید د احتمالي «جنګي جرم» په توګه وڅېړل شي

دغه سازمان ویلي، تر اوسه داسې کوم باوري شواهد نه دي وړاندې شوي چې وښيي یاد روغتیايي مرکز پوځي هدف و. د بښنې نړیوال سازمان ټینګار کړی چې د ملکي تاسیساتو او روغتیايي مرکزونو په نښه کول د نړیوالو بشري قوانینو له مخې جدي موضوع ده او باید بې پرې څېړنه پرې وشي

په ورته وخت کې، د کابل یو شمېر اوسېدونکو او سیاسي شنونکو پر طالبانو او نړیوالې ټولنې نیوکه کړې چې د ملکي وګړو د مرګ‌ژوبلې په اړه یې کافي غبرګون نه دی ښودلی

دوی وایي، د جګړو په ترڅ کې د ملکي افغانانو خوندیتوب باید د ټولو لورو لپاره لومړیتوب وي او د ورته پېښو د مخنیوي لپاره باید عملي اقدامات ترسره شي

تر اوسه د پاکستان حکومت د دې برید په اړه خپلې پخوانۍ څرګندونې تکرار کړې، خو د بښنې نړیوال سازمان وايي چې د ادعاوو د ارزونې لپاره باید بشپړه او خپلواکه څېړنه ترسره شي