تعلیم

د پاکستان سناتور: د افغان محصلانو د ایستلو پرېکړه دې سمدستي لغوه شي

اشتراک گذاری:

بریانیوز پنجشنبه ( ۱۹/ سنبله /۱۴۰۵هـ.ش)

اسلام‌اباد — د پاکستان په سنا کې د مخالفو ګوندونو مشر علامه راجا ناصر عباس د افغان محصلانو د ایستلو په اړه د پاکستان د طبي او غاښونو شورا پرېکړه غندلې او له حکومت څخه یې غوښتي چې دغه پرېکړه سمدستي لغوه کړي

ناصر عباس ویلي، له پاکستان څخه د هغو افغان محصلانو ایستل چې د طب او غاښونو په برخو کې زده‌کړې کوي، په ځانګړي ډول د وروستي کال محصلانو ته به جدي زیان ورسوي او د کلونو زده‌کړو راتلونکی به یې له ګواښ سره مخ کړي

نوموړي ټینګار کړی چې افغان محصلانو د خپلو زده‌کړو د بشپړولو لپاره کلونه وخت او مالي امکانات لګولي دي او په دې پړاو کې د هغوی ایستل کولای شي د هغوی د مسلکي راتلونکي لپاره لوی خنډ رامنځته کړي

د پاکستان دغه سناتور له حکومت څخه غوښتنه کړې چې د افغان محصلانو موضوع له سیاسي بحثونو څخه لرې وساتي او پرېکړه وکړي چې هغوی خپلې پاتې زده‌کړې په پاکستان کې بشپړې کړي

ناصر عباس ویلي، د زده‌کړو په برخه کې باید د سیاسي اختلافاتو له امله پر محصلانو فشار رانه‌شي او هغو افغان زده‌کړیالانو ته باید فرصت ورکړل شي چې خپلې تحصیلي دورې په بشپړه توګه پای ته ورسوي

د نوموړي په وینا، د افغان محصلانو د زده‌کړو دوام نه یوازې د هغوی د راتلونکي لپاره مهم دی، بلکې د پاکستان او افغانستان ترمنځ د علمي او بشري اړیکو د ساتلو لپاره هم ارزښت لري