ولسمشر مسعودپزشکیان: امریکا او اسرائیل د «دولتي ترهګرۍ» تر شا ولاړ دي

ولسمشر مسعودپزشکیان: امریکا او اسرائیل د «دولتي ترهګرۍ» تر شا ولاړ دي

 بریانیوز دوشنبه (۲۳/ سنبله /۱۴۰۵هـ.ش)

 د ایران ولسمشر مسعود پزشکیان امریکا او اسرائیل په «دولتي ترهګرۍ» تورن کړي او ویلي یې دي چې دواړه هېوادونه د پرمختللې ټکنالوژۍ په وسیله خلک په نښه کوي، خو وروسته پر خپلو هدفونو د «ترهګرۍ» نوم ږدي

پزشکیان ویلي، امریکا او اسرائیل په سوریه، لبنان، غزه، عراق، قطر او ایران کې داسې اقدامات کړي چې د ده په وینا، د هغوی ترمنځ د چلند له پلوه کوم بنسټیز توپیر نه لیدل کېږي

نوموړي ادعا کړې چې امریکا او اسرائیل خپل ټاکلي کسان د وژنې لپاره په نښه کوي او کله ناکله د یوه کس د له منځه وړلو لپاره یوه کورنۍ یا ټوله ودانۍ هم هدف ګرځوي

د ایران ولسمشر ویلي، له پرمختللو وسلو او ټکنالوژۍ څخه د بریدونو لپاره استفاده کېږي، خو وروسته د دغو بریدونو قربانیان د «ترهګرو» په نوم یادېږي. هغه دا ډول چلند د منلو وړ نه دی بللی

پزشکیان ټینګار کړی چې که د یوه ټاکلي کس د وژلو لپاره د هغه کورنۍ یا نور کسان هم په نښه کېږي، نو دا اقدام باید د ترهګرۍ په توګه وکتل شي

نوموړي په خپلو څرګندونو کې امریکا او اسرائیل «واقعي ترهګر او دولتي ترهګر» بللي او له نړیوالې ټولنې یې غوښتي چې د ورته اقداماتو پر وړاندې چوپ پاتې نه شي

د ایران ولسمشر دا څرګندونې په داسې وخت کې کوي چې د ایران، امریکا او اسرائیلو ترمنځ روان کړکېچ د منځني ختیځ پر امنیتي وضعیت او د سیمې پر سیاسي او پوځي معادلو پراخ اغېز کړی دی