ولسمشر ډونالد ټرمپ: له ایران سره جګړه به د امریکا له منځمهاله ټاکنو وروسته پای ته ورسېږي

ولسمشر ډونالد ټرمپ: له ایران سره جګړه به د امریکا له منځمهاله ټاکنو وروسته پای ته ورسېږي

 بریانیوز پنجشنبه ( ۱۹/ سنبله /۱۴۰۵هـ.ش)

واشنګټن — د امریکا ولسمشر ډونالد ټرمپ ویلي، له ایران سره روانه جګړه به د نومبر په میاشت کې د امریکا د منځمهاله ټاکنو له ترسره کېدو سمدستي وروسته پای ته ورسېږي

ټرمپ ادعا کړې چې تهران د اقتصادي فشارونو له امله نور د جګړې د اوږدولو توان نه لري او ایران هڅه کوي چې د امریکا پر ټاکنو اغېز وکړي. نوموړي ویلي، د اقتصادي فشارونو دوام به د ایران مقاومت نور هم کمزوری کړي

د امریکا ولسمشر زیاته کړې چې واشنګټن د هرمز تنګي کنټرول په لاس کې لري. په وروستیو ورځو کې د دغه ستراتیژیک تنګي پر سر د امریکا او ایران ترمنځ کړکېچ یو ځل بیا زیات شوی او د تېلو بیې هم له ۱۰۰ ډالرو څخه لوړې شوې دي

ټرمپ ویلي، که څه هم دا مهال د امریکا او ایران ترمنځ د خبرو اترو لپاره کومه رسمي هڅه نه کېږي، خو د دواړو هېوادونو ترمنځ د مذاکراتو امکان یې په بشپړه توګه رد کړی نه دی

نوموړي باور څرګند کړی چې له ټاکنو وروسته به د جګړې د پای ته رسېدو او د سیمې د کړکېچ د کمېدو زمینه برابره شي؛ خو د امریکا مرستیال ولسمشر جې‌ډي ونس بیا ویلي چې د جګړې د پای دقیق وخت اټکلول اسانه نه دي

د امریکا منځمهاله ټاکنې د نومبر پر درېیمه نېټه ترسره کېږي او د ټرمپ د ادارې لپاره په داسې مهال مهمې بلل کېږي چې د ایران جګړې او د انرژۍ د بیو لوړېدو په امریکا کې اقتصادي او سیاسي فشارونه زیات کړي دي