کاناډا تحلیلي راپور: د افغانستان جګړې د کاناډا پر پوځي مشرتابه او دفاعي سیاست ژور اغېز کړی

کاناډا تحلیلي راپور: د افغانستان جګړې د کاناډا پر پوځي مشرتابه او دفاعي سیاست ژور اغېز کړی

 بریانیوز پنجشنبه ( ۱۹/ سنبله /۱۴۰۵هـ.ش)

 د کاناډا د ناټو ټولنې په یوه تحلیلي راپور کې ویل شوي چې د افغانستان جګړې یوازې د کاناډا د پوځ پر عملیاتو اغېز نه دی کړی، بلکې د دغه هېواد پر پوځي مشرانو، دفاعي لومړیتوبونو او پوځي تګلارو یې هم ژور اغېز پرې ایښی دی

په راپور کې د افغانستان جګړه د کاناډا د پوځ لپاره یوه مهمه تجربه بلل شوې چې د دغه هېواد د پوځي وړتیاوو، روزنې، قوماندې او بهرنیو پوځي عملیاتو په اړه یې د تصمیم‌نیونې پر څرنګوالي اغېز کړی دی

کاناډا له ۲۰۰۱ کال وروسته په افغانستان کې د ناټو په چوکاټ کې پراخ پوځي حضور درلود او په ځانګړي ډول په کندهار کې یې د جګړې او امنیتي عملیاتو مهمه برخه پر مخ یووړه. دغه هېواد وروسته تر ۲۰۱۱ کال پورې خپل جنګي عملیات پای ته ورسول، خو تر ۲۰۱۴ کال پورې یې د افغان ځواکونو د روزنې په برخه کې حضور ته دوام ورکړ

د راپور د شننې له مخې، د افغانستان تجربه د کاناډا د دفاعي سیاستونو په جوړولو کې هم اغېزناکه وه او د دغه هېواد پوځي مشرتابه یې دې ته اړ کړ چې د راتلونکو بهرنیو ماموریتونو، پوځي روزنې او دفاعي لومړیتوبونو په اړه خپلې تجربې بیا وارزوي

د افغانستان جګړې په کاناډا کې د پوځي ماموریتونو د موخې، د ناټو له متحدینو سره د همکارۍ او د پوځي او غیرپوځي هڅو د ګډولو په اړه هم پراخ بحثونه رامنځته کړل. د ۲۰۰۸ کال د منلي راپور، چې د کاناډا د افغانستان د راتلونکي رول د ارزونې لپاره جوړ شوی و، هم د پوځي حضور ترڅنګ پر روزنې، بیارغونې او دیپلوماتیکو هڅو د زیات تمرکز سپارښتنه کړې وه

کاناډا اوس هم د افغانستان د جګړې تجربه د خپل پوځي تاریخ له مهمو پړاوونو څخه ګڼي، په ځانګړي ډول هغه مهال چې دغه هېواد د سړې جګړې له پای وروسته په نړیوالو امنیتي عملیاتو کې د خپل پوځ رول پراخ کړ