مقاله

روسیه: د تاجکستان او افغانستان پر ګډه پوله د امنیت ټینګول د مسکو لومړیتوب دی

اشتراک گذاری:

بریانیوز پنجشنبه ( ۱۹/ سنبله /۱۴۰۵هـ.ش)

مسکو — د روسیې دفاع وزیر اندري بلوسوف وايي، د تاجکستان او افغانستان پر ګډه پوله د امنیت پیاوړتیا د مسکو د امنیتي او دفاعي پروګرامونو له مهمو لومړیتوبونو څخه ده

بلوسوف ویلي، روسیه د تاجکستان او افغانستان ترمنځ د پولې امنیتي وضعیت ته ځانګړې پاملرنه کوي او د سیمې د احتمالي امنیتي ګواښونو د مخنیوي لپاره د تاجکستان د سرحدي وړتیاوو پیاوړتیا مهمه بولي

د روسیې دفاع وزیر ټینګار کړی چې د افغانستان وضعیت د منځنۍ اسیا د امنیت پر وضعیت اغېز لري او له همدې امله مسکو غواړي د تاجکستان په جنوبي پوله کې د امنیت د ټینګښت لپاره خپلو همکاریو ته دوام ورکړي

دا څرګندونې په داسې مهال کېږي چې د افغانستان او تاجکستان ترمنځ شاوخوا ۱۳۰۰ کیلومتره اوږده پوله د منځنۍ اسیا د امنیتي بحثونو یوه مهمه برخه بلل کېږي

روسیه په تاجکستان کې خپله پوځي اډه هم لري، او بلوسوف په وروستیو څرګندونو کې ویلي چې دغه اډه د بهرنیو ګواښونو پر وړاندې د مقابلې لپاره چمتو ده.

د مسکو له نظره، د تاجکستان او افغانستان د پولې امنیت نه یوازې د دواړو هېوادونو، بلکې د منځنۍ اسیا د پراخې امنیتي فضا لپاره هم اهمیت لري