مشهد : ایران او افغانستان ترمنځ د رسمي پُستي خدمتونو د پیل لپاره زمینه برابره شوه

مشهد : ایران او افغانستان ترمنځ د رسمي پُستي خدمتونو د پیل لپاره زمینه برابره شوه

 بریانیوز سه شنبه (۲۴/ سنبله /۱۴۰۵هـ.ش)

  د ایران د رضوي خراسان ولایت د پُست عمومي مدیر حسین شریفي وایي، د ایران او افغانستان ترمنځ د پُستي کڅوړو او پارسلونو د رسمي تبادلې لپاره اړینې زیربناوې برابرې شوې دي او دغه بهیر به ډېر ژر پیل شي

شریفي ویلي، د دواړو هېوادونو ترمنځ د رسمي پُستي همکاریو د هوکړه‌لیک د لاسلیک لپاره به د افغانستان د پُست ادارې یو پلاوی روانه میاشت تهران او مشهد ته سفر وکړي

د هغه په وینا، د پُستي کڅوړو د لېږد بهیر به د رضوي خراسان او د افغانستان د هرات ترمنځ د ځمکنۍ پولې له لارې ترسره کېږي او په هوايي برخه کې به د مشهد ـ کابل مستقیمې الوتنې هم د پُستي توکو د لېږد لپاره وکارول شي

د ایران د پُست چارواکي ویلي، د دې خدمتونو له فعالېدو سره به د دواړو هېوادونو ترمنځ د برېښنايي سوداګرۍ لپاره هم زمینه برابره شي، څو په افغانستان کې پېرودونکي وکولای شي له ایراني شرکتونو څخه توکي او خدمتونه واخلي او خپل فرمایشونه د رسمي پُستي شبکې له لارې ترلاسه کړي

شریفي زیاته کړې، د افغانستان او ایران ترمنځ د پُستي همکاریو د بیا پراخېدو لپاره له مخکې هم خبرې شوې دي. د روان کال په جولای کې د ایران د سفیر مرستیال په کابل کې د افغان پُست له چارواکو سره د دواړو هېوادونو ترمنځ د پُستي خدمتونو د پراختیا په اړه خبرې کړې وې

د ایران چارواکي وایي، د دغه بهیر په عملي کېدو سره به د دواړو هېوادونو ترمنځ د پُستي خدمتونو ترڅنګ د سوداګریزو راکړو ورکړو او انلاین پېر او پلور لپاره هم نوې اسانتیا رامنځته شي