سیاست

طاهر محمود اشرفي: د سعودي عربستان امنیت د پاکستان لپاره سره کرښه ده

اشتراک گذاری:

بریانیوز سه شنبه (۲۴/ سنبله /۱۴۰۵هـ.ش)

د پاکستان د علماوو شورا مشر محمد طاهر محمود اشرفي د سعودي عربستان امنیت او ثبات د پاکستان لپاره «سره کرښه» بللی او ویلي یې دي چې هېچا ته به اجازه ورنه کړي چې له دې کرښې واوړي

اشرفي د منځني ختیځ له ښکېلو لورو د زغم غوښتنه کړې او ټینګار یې کړی چې پر یو بل دې بریدونه سمدستي ودرول شي، څو په سیمه کې د جګړې د لا پراخېدو مخه ونیول شي

د هغه دا څرګندونې وروسته له هغې کېږي چې د حوثیانو له لوري پر سعودي عربستان د بې‌پیلوټه الوتکو او بالستیک توغندیو د بریدونو راپورونه خپاره شوي دي. د سعودي چارواکو په وینا، په وروستیو بریدونو کې د هېواد په سوېلي سیمو کې ملکي وګړي ټپیان شوي دي

اشرفي ویلي، د سعودي عربستان امنیت یوازې د دغه هېواد موضوع نه ده، بلکې د سیمې د ثبات او د اسلامي نړۍ له امنیت سره تړاو لري. هغه د جګړې له ټولو اړخونو غوښتي چې له پوځي اقداماتو ډډه وکړي او د کړکېچ د کمولو لپاره د خبرو لارې غوره کړي

نوموړي همداراز د یوه خپلواک فلسطیني دولت د جوړېدو لپاره د سعودي عربستان هڅې ستایلې او ویلي یې دي چې د فلسطین د مسئلې عادلانه حل د سیمې د اوږدمهاله سولې لپاره مهم دی

د حوثیانو بریدونه په داسې حال کې دوام لري چې د سعودي عربستان او د سیمې د نورو هېوادونو امنیت د وروستیو سیمه‌ییزو کړکېچونو له امله له زیاتېدونکو ننګونو سره مخ دی. په وروستیو بریدونو کې د سعودي ملکي او اقتصادي تاسیسات هم په نښه شوي دي.