صنعا : حوثیانو پر سعودي پوځي اډې د پراخ برید ادعا کړې؛ د تېلو بیه لوړه شوې

صنعا : حوثیانو پر سعودي پوځي اډې د پراخ برید ادعا کړې؛ د تېلو بیه لوړه شوې

بریانیوز سه شنبه (۲۴/ سنبله /۱۴۰۵هـ.ش)

 د ایران له ملاتړه برخمنو حوثیانو ادعا کړې چې د سعودي عربستان په خمیس مشیط سیمه کې یې پر ملک خالد هوايي اډې پراخ برید کړی دی

د حوثیانو پوځي ویاند یحیی سریع ویلي، په دغه برید کې یې لسګونه بې‌پیلوټه الوتکې او بالستیک توغندي کارولي دي. تر اوسه د سعودي عربستان له لوري د دغې ادعا د بشپړ تایید یا د اوښتو زیانونو په اړه رسمي جزییات نه دي خپاره شوي

دا بریدونه په داسې حال کې کېږي چې د سعودي عربستان او حوثیانو ترمنځ نښتې د منځني ختیځ د روان کړکېچ له پراخېدو سره یو ځل بیا زیاتې شوې دي. حوثیان په وروستیو ورځو کې د سعودي پر پوځي او انرژۍ اړوندو تاسیساتو د بریدونو ادعاوې کوي

د دغو بریدونو له زیاتېدو سره د نړیوالو بازارونو د تېلو بیې هم لوړې شوې دي. د رویټرز د راپور له مخې، د دوشنبې په ورځ د برېنټ خام تېلو بیه ۳.۶۲ ډالره لوړه شوه او هر بېرل په شاوخوا ۱۰۸.۲۳ ډالرو وپلورل شو، په داسې حال کې چې د امریکا د تېلو بیه هم له درې سلنې ډېره لوړه شوه

د تېلو د بیو د لوړوالي یو مهم لامل د سعودي عربستان پر انرژۍ بنسټونو د بریدونو له امله د نړیوالو تېلو د رسولو په اړه د بازارونو اندېښنه بلل کېږي. د سعودي ختیځ ـ لویدیځ د تېلو مهمه نل‌لیکه هم د وروستیو بریدونو له امله له فعالیت څخه وتلې، چې د نړیوالې عرضې په اړه یې اندېښنې زیاتې کړې دي

د بازار شنونکي خبرداری ورکوي چې که په سیمه کې پوځي کړکېچ دوام وکړي او د تېلو د لېږد مهمې لارې له خنډ سره مخ شي، د انرژۍ بیې ښايي لا لوړې شي او د نړۍ پر اقتصاد فشار زیات کړي