تعلیم

افغان طبي زده‌کړیالانو: د پاکستان د طب شورا پر پرېکړه محکمه کې دعوه ثبت کړه

اشتراک گذاری:

بریانیوزچهار شنبه (۲۵/ سنبله /۱۴۰۵هـ.ش)

اسلام‌اباد — یو شمېر افغان طبي زده‌کړیالانو د پاکستان د طب او غاښونو شورا د هغو پرېکړو پر ضد محکمې ته مراجعه کړې چې له مخې یې په پاکستان کې پر زده‌کړو بوخت افغان طبي زده‌کړیالانو ته د بېرته ستنېدو لارښوونه شوې ده

د زده‌کړیالانو په عریضه کې غوښتنه شوې چې د پاکستان د طب او غاښونو شورا د جولای ۳۱مې او سپټمبر لومړۍ نېټې لارښوونې دې ناقانونه او له اساسي قانون سره په ټکر کې وبلل شي او د پلي کېدو مخه دې ونیول شي

د راپورونو له مخې، د سپټمبر په لومړۍ نېټه د طب او غاښونو شورا په یوه خبرتیا کې له طبي او غاښونو له زده‌کړیزو بنسټونو وغوښتل چې په پاکستان کې پر زده‌کړو بوخت افغان زده‌کړیالان بېرته افغانستان ته ستانه کړي. په خبرتیا کې د روانې زده‌کړیزې دورې لپاره د افغانانو د نوي شاملېدو، لېږد او ورته اسانتیاوو محدودول هم شامل وو

د زده‌کړیالانو وکیلان استدلال کوي چې شورا د دغسې پرېکړې د کولو قانوني واک نه لري او د کلونو زده‌کړو وروسته د دوی ناڅاپي ایستل به د زده‌کړو بهیر له جدي خنډ سره مخ کړي. د دغو دعوو له ډلې یوه د ۱۳ افغان طبي زده‌کړیالانو له لوري ثبت شوې وه

په ورته مهال، د لاهور عالي محکمې د سپټمبر په ۱۱مه د افغان طبي زده‌کړیالانو په اړه د شورا د یادو لارښوونو پلي کېدل تر راتلونکې اورېدنې پورې وځنډول او اړوندو بنسټونو ته یې امر وکړ چې زده‌کړیالان له خپلو زده‌کړو، ازموینو او لیلیو څخه ونه باسي

د پاکستان د بهرنیو چارو وزارت هم ویلي چې د ټولو افغان زده‌کړیالانو د ایستلو عمومي پرېکړه نه ده شوې او هغه افغان زده‌کړیالان چې په پېژندل شویو زده‌کړیزو پروګرامونو کې شامل وي او معتبرې ویزې ولري، کولی شي خپلې زده‌کړې بشپړې کړي