اوکراین: په جګړه کې د روسیې پوځي تلفات له ۱.۵ میلیونو اوښتي

اوکراین: په جګړه کې د روسیې پوځي تلفات له ۱.۵ میلیونو اوښتي

 بریانیوز پنجشنبه ( ۱۹/ سنبله /۱۴۰۵هـ.ش)

کییف — د اوکراین د وسله‌ والو ځواکونو لوی درستیز وايي، په اوکراین کې د روسیې د پوځ ټول تلفات له ۱.۵ میلیونو وژل شویو او ټپیانو اوښتي دي

د اوکراین د لوی درستیز د معلوماتو له مخې، د روسیې د پوځ د پرسونل تلفات تر اوسه شاوخوا ۱ میلیون او ۵۰۰ زره کسانو ته رسېدلي دي. د اوکراین چارواکي دغه شمېر د روسیې د پوځ د وژل شویو او ټپیانو ګډه شمېره بولي

اوکرایني چارواکي وايي، د روسیې دغه پوځي تلفات د دویمې نړیوالې جګړې وروسته د دغه هېواد په مهمو پوځي شخړو کې بې‌ساري کچې ته رسېدلي دي

د اوکراین د لوري په وینا، د روسیې تلفات د شوروي اتحاد د افغانستان د نږدې لس کلنې جګړې له رسمي تلفاتو څو برابره لوړ دي او د چیچنیا د دوو جګړو له رسمي تلفاتو هم ډېر زیات دي

خو د روسیې د پوځ د تلفاتو د دقیقې شمېرې په اړه خپلواکه تایید لا هم ستونزمن دی. د اوکراین د لوی درستیز وړاندې کړې شمېره د جګړې د یوه ښکېل لوري معلومات دي او مسکو د دغو شمېرو په اړه بېلابېل دریځونه لري

د جګړې په دوام سره د دواړو هېوادونو ترمنځ بریدونه هم روان دي. د وروستیو ورځو په ترڅ کې روسي ځواکونو پر کییف او د اوکراین پر نورو سیمو پراخ هوايي بریدونه کړي، په داسې حال کې چې اوکراین هم د روسیې پر پوځي او انرژۍ تاسیساتو د اوږد واټن بریدونو ته دوام ورکړی دی

د جګړې د پای ته رسولو لپاره د امریکا په منځګړیتوب د روسیې او اوکراین ترمنځ د خبرو د بیا پیل هڅې هم روانې دي، خو تر اوسه د جګړې د پای ته رسولو په برخه کې د پام وړ پرمختګ نه دی شوی