سیاست

ولسمشر ډونالد ټرمپ: که جمهوري غوښتونکي بریالي شي، هر امریکايي بالغ ته به ۵۰۰۰ ډالر ورکړل شي

اشتراک گذاری:

بریانیوز جمعه (۲۰/ سنبله /۱۴۰۵هـ.ش)

د امریکا ولسمشر ډونالد ټرمپ د جمهوري غوښتونکو ګوند د منځمهاله ټاکنو د لومړي کنوانسیون په پای کې ژمنه کړې چې که دغه ګوند د نومبر په ټاکنو کې د کانګرس واک وساتي، هر امریکايي بالغ ته به ۵۰۰۰ ډالر ورکړي

ټرمپ دغه پیسې د «ټرمپ ونډې» په نوم یادې کړې او ویې ویل چې امریکایان به یې د جمهوري غوښتونکو د بریا په صورت کې ترلاسه کړي. نوموړي د دې طرحې د عملي کېدو کره څرنګوالی او د پیسو د تمویل بشپړ جزئیات نه دي روښانه کړي

د راپورونو له مخې، که شاوخوا ۲۷۰ میلیونه امریکايي بالغان د دې مرستې مستحق وبلل شي، د طرحې ټول لګښت به نږدې ۱.۳۵ ټریلیون ډالرو ته ورسېږي

د امریکا مرستیال ولسمشر جې‌ډي ونس ویلي، ښايي د تعرفو له عوایدو څخه د دې پیسو د برابرولو لپاره کار واخیستل شي، خو د امریکا د حکومت اوسني تعرفه‌یي عواید د دې ستر لګښت د بشپړ پوښښ لپاره کافي نه ښکاري

د ټرمپ دا ژمنه داسې مهال مطرح شوې چې د امریکا د منځمهاله کانګرس ټاکنې د نومبر پر درېیمه ترسره کېږي. د طرحې د عملي کېدو لپاره د کانګرس تصویب ته اړتیا ده او د دې د مالي اغېزو په اړه هم د اقتصادي کارپوهانو او د دواړو ګوندونو ترمنځ بحثونه راپورته شوي دي