مقاله

ریچارډ بېنېټ: طالبان باید د افغانستان د راتلونکي په اړه د خبرو یوازینی لوری نه وي

اشتراک گذاری:

بریانیوز جمعه (۲۰/ سنبله /۱۴۰۵هـ.ش)

کابل — د افغانستان لپاره د ملګرو ملتونو پخواني ځانګړي راپور ورکوونکي ریچارډ بېنېټ ویلي، طالبان باید د افغانستان د راتلونکي په اړه د خبرو اترو یوازینی لوری ونه بلل شي

بېنېټ ټینګار کړی چې د افغانستان د راتلونکي په اړه هر ډول سیاسي بحث او پرېکړه باید د هېواد د بېلابېلو قشرونو، په ځانګړي ډول د ښځو، نجونو، مدني ټولنې او نورو افغانانو نظرونه هم په پام کې ونیسي

نوموړي ویلي، د افغانستان د راتلونکي په اړه د یوه ټولشموله بهیر رامنځته کول اړین دي او د هېواد هېڅ قشر باید له سیاسي او ټولنیزو بحثونو څخه په بشپړه توګه ونه ایستل شي

ریچارډ بېنېټ تر دې وړاندې هم په افغانستان کې د بشري حقونو، په ځانګړي ډول د ښځو او نجونو د حقونو په اړه د طالبانو پر سیاستونو نیوکې کړې دي

د نوموړي څرګندونې په داسې حال کې کېږي چې د افغانستان د سیاسي راتلونکي، د طالبانو له حکومت سره د نړیوالې ټولنې د تعامل او د یوه ټولشموله سیاسي بهیر د رامنځته کېدو په اړه بحثونه لا هم دوام لري